Ministri i Brendshëm Taulant Balla ka reaguar sërish për ngjarjen tepër të rëndë në Shkodër, ku një nënë dyshohet se është hedhur në lumin Bunë bashkë me 3 fëmijët e saj.
Balla shprehet se asnjë lloj dhune nuk është e tolerueshme, teksa nënvizon se po vijojnë kërkimet për trupat e pajetë.
“Njësia e specializuar e RENEA, Forca Kombëtare e Sigurisë Publike, njësi të Policisë së Malit të Zi dhe peshkatarët e zonës janë duke vijuar kërkimin e përgjatë gjithë rrjedhës së lumit Buna, ku dyshohet të jetë vetëmbytur një nënë dhe fëmijët e saj. Siç kemi bërë edhe dje me dije, Policia e Shtetit ka ndaluar bashkëshortin dhe ka dyshime të forta se dhuna në familje, presioni psikologjik kanë shtyrë viktimën drejt këtij akti tragjik. Gjej rastin t’i bëj thirrje çdo gruaje të denoncojë çdo lloj forme dhune. Dhuna shpesh manifestohet në shtëpi, mbrapa dyerve të mbyllura, por kjo është një temë që duhet bërë publike. Dhuna ndaj grave nuk është një çështje private. Ajo na intereson të gjithëve. Dhe ne, e gjithë shoqëria, duhet t’i nxisim viktimat e dhunës ta denoncojnë. Nuk mund të ketë #AsnjëJustifikim ndaj dhunës – as në shtëpi, as në vendin e punës, as në jetën publike, as online. Askund!“, shkruan Balla.
Në një deklaratë për mediat nga Ura e Bunës, Balls deklaroi se trupi i nënës dhe fëmievë ndodhet tek Ura e Bunës.
Sipas tij, gratë duhet të denoncojnë dhunën e çdo forme.
Taulant Balla: “Dyshohet se edhe trupi i nënës dhe fëmijës tjetër dyshohet se është në këtë zonë. Policia dhe peshkatarët do vazhdojnë non stop për të gjetur nënën dhe fëmijën tjetër. Ngjarja është e rëndë, fjalët nuk i lidhim dot. Iu bëj thirrje grave dhe vajzave në këtë vend që të denoncojnë dhunën. Ne si shoqëri duhet t’ju japim besim grave që të shpëtojnë nga dhuna me bazë gjinore, dhuna seksuale. Duhet të ketë reagim mbarëshoqëror, sepse rol luan kushdo. Gratë të denoncojnë dhunën“.
Kujtojmë që pasditen e sotme është gjetur një tjetër trup në lumin Buna, që dyshohet se i përket një prej fëmijëve të 39-vjeçares Alma Arrazi që u mbyt bashke me tre fëmijët.
Ky është fëmija i dytë që gjendet, pas vajzës 9-vjeçare Ergesa që u gjet ditën e djeshme dhe u përcoll sot për në banesën e fundit.
Polumbarët e RENEA-s vijojnë kërkimet për gjetjen e trupit të 39-vjeçares Alma Arrazi dhe fëmijës së tretë.
Lexo edhe:
https://boldnews.al/2024/05/06/nena-me-3-femijet-u-mbyt-ne-lumin-buna-gjendet-trupi-i-pajete-i-femijes-se-dyte/
