Nga Boldnews.al
Studentët në SHBA po bëjnë namin. Dhunë mbi policinë, flakë e tym në protesta, klithje për lirinë e Palestinës dhe thirrje kundër presidentit Joe Biden. E sikur të mos mjaftojë vetëm kjo “gjëmë e madhe”, kandidati për president, Donald Trump, që për nga hierarkia konsiderohet edhe si lideri i opozitës, po hedh akuza të rënda ndaj sistemit të drejtësisë atje. Po sulmon “SPAK-istat” dhe “GJKKO-istat” (Prokurorinë dhe gjytata atje)…
Këtë situatë kaq të rëndë nuk e duron më aspak ambasadori ynë fuqiplotë në SHBA, Ervin Bushati, ish-deputet i PS-së. Ai po mendon seriozisht një reagim të përflaktë. Thuhet se nuk do të presë fare qëndrimin e ambasadorit Britanik në SHBA, e aq më pak atyre të vendeve të BE-së për të reaguar. Bushati është mbyllur në zyrë dhe mund të shpërthejë fort në deklarata, ku do të “trondisë” si protestuesit studentë, ashtu edhe Trumpin dhe gjithë Republikanët.
Po nga do niset Bushati? Si një njeri i lexuar që ndjek politikën kudo, mund të marrë si shembull reagimin e homologëve këtu në Shqipëri. Një copëz zjarr në derën që “mbyll” korrupsionin e frikshëm në Bashkinë e Tiranës u hodh dhe pa kaluar as pak minuta pati reagime të rrufeshme nga përfaqësitë diplomatike.
Ai amerikan nuk është as ambasador, por “i dërguar me punë” dhe bëri gjithë atë punë të madhe, duke i dhënë frymë Veliajt, e ca më tepër Ramës. “Ambasada e Shteteve të Bashkuara dënon aktet e dhunës gjatë protestës pranë Bashkisë së Tiranës. E drejta për t’u mbledhur në mënyrë paqësore, për të protestuar dhe për të kërkuar veprim kundër korrupsionit janë të gjitha jetike në çdo demokraci, por nuk ka vend për dhunën e ndërmarrë nga organizatorët. Aktorët politikë të përgjegjshëm duhet të refuzojnë çdo formë dhune. Përshëndesim zyrtarët e forcave të rendit për profesionalizmin e tyre”-tha i dërguari me punë i ambasadës së SHBA-ve. Pas tij, reagoi edhe Smithi britanik, me thuajse të njetin tekst dhe ai i BE-së.
Po ndaj protestave të “dhunshëm” në SHBA përse nuk mban qëndrim Bushati ynë? Thonë se po përgatit një reagim që organizatorët e protestës, por edhe vetë Trump do e presë me shumë vëmendje dhe nuk përjashtohet mundësia që të tërhiqen… Po ashtu do i japë mbështetje forcave të rendit për “profesionalizmin” ndaj reagimit të dhunshëm të studentëve. Do u japë kurajo edhe “policëve civilë” të “Rilindjes Amerikane” që pavarësisht se mund të provokojnë turmën, sërish do të falenderohen. Mos do të quhet çmenduri një qëndrim i tillë? Jo, Bushati ka shembull nga të marrë, ja të shohë kolegët këtu në Tiranë, ose më saktë homologët këtu, pasi fjalën “kolegë” vend e pa vend, por më shumë pa vend, ka të drejtë ta përdorë vetëm një njeri, Erion Veliaj. Amabasadori ynë mendohet “seriozisht” që në të njëjtën deklaratë të përfshijë edhe mendimin mbi aktin e “pashembullt” që kandidati për president dhe lideri i opozitës Trump sulmon “drejtësinë e pavarur” atje.
Ndaj Bushati do të thotë: “Shqipëria mbështet drejtësinë Amerikane dhe është kundër çdo intimidimi të sistemit të drejtësisë që vjen nga elita politike e opozitës”. Bushati mbetet në dilema në “detaje të vogla”, nëse mban një qëndrim të ashpër kundër “akteve të dhunshme”, mos ikin nga rruga dhe shkojnë në atë zguqe ambasadë? Apo përgjigja që duhet të qëndrojë mbetet universal: shtet ata dhe shtet ne. Vetë lideri ynë “globalo-rajonal” është shprehur se Shqipëria si kurrë më parë shihet si partner serioz në arenën ndërkombëtare. Pra edhe qëndrimet duhet të jenë reciproke…!
