Policia e Beratit ka reaguar në lidhje me rastin e publikuar në emisionin “Fiks Fare”, ku Kastriot Hoxha nga fshati Çiflig i Urës Vajgurore tregoi se para 7 vitesh ka blerë një shtëpi, për të cilën disponon certifikatë pronësie, por sapo e ka blerë, një polic i Komisariatit të Policisë së Urës Vajgurore, i cili njëkohësisht është edhe vëllai i komshies së zotërisë, e kërcënon se do ja shembin shtëpinë.
Kastriot Hoxha tregoi se efektivi Miti Mata i ka kërkuar 3 milion lekë ryshfet për ta lënë rehat dhe pasi nuk ia dha tani e kërcënon se do i vrasë djalin.
Policia e Beratit bën me dije se efektivi i Policisë, Dh. Mata është pezulluar nga detyra dhe rasti po hetohet nga Agjencia e Mbikëqyrjes Policore.
Reagim i Drejtorisë Vendore të Policisë Berat
Në lidhje me rastin e transmetuar në emisionin investigativ “Fiks-Fare”, ku një qytetar pretendon se është kërcënuar dhe shantazhuar nga një punonjës Policie në Stacionin e Policisë Dimal, ju bëjmë me dije se:
Drejtori i Drejtorisë Vendore të Policisë Berat ka bërë pezullimin e menjëhershëm nga detyra të punonjësit të Policisë Inspektor Dh.M., dhe Drejtoria e Standardeve Profesionale në Policinë e Shtetit ka nisur hetimin disiplinor ndaj tij.
Ndërkohë Agjencia e Mbikëqyrjes Policore po kryen veprime për sqarimin e rrethanave të rastit.
Drejtoria Vendore e Policisë Berat falënderon mediat dhe qytetarët që denoncojnë rastet e abuzimit me detyrën të punonjësve të Policisë dhe i fton sërish ata, që të denoncojnë çdo rast të tillë, duke i’u garantuar reagim të menjëhershëm e të paanshëm.
