Një denoncim i mbërritur në redaksinë e Boldnews ngre pikëpyetje mbi mënyrën se si po organizohet pjesëmarrja në takimin që Kryeministri Edi Rama pritet të zhvillojë në Vlorë.
Sipas mesazhit të dërguar në redaksi, drejtuesve të strukturave u është kërkuar të hartojnë lista me emrat e personave që do të marrin pjesë në aktivitet, duke përfshirë jo vetëm punonjës të institucioneve, por edhe persona jashtë tyre.
Në listë kërkohet të përfshihen emri, mbiemri dhe numri i telefonit i çdo pjesëmarrësi, me argumentin se më pas ata do të kontaktohen nga selia për konfirmim.
“Ditën e premte do të zhvillohet takimi me Kryeministrin dhe nga secila OS kërkohet lista e personave që do të marrin pjesë (edhe jashtë OS-së, pasi synohet një pjesëmarrje sa më e gjerë)… Këto të dhëna nevojiten pasi pjesëmarrësit do të kontaktohen nga Selia për konfirmim.Ju lutem, dërgojini listat brenda paradites së nesërme.”, thuhet në mesazhin e siguruar nga Boldnews.
Kjo është një formë presioni ndaj administratës për të siguruar pjesëmarrje sa më të lartë në aktivitetin e Kryeministrit.
Denoncimi rikthen në vëmendje raste të ngjashme të raportuara ndër vite.
20 PRILL 2018 – Denoncimi për takimin e Ramës në Fier
Një tjetër rast u raportua më 20 prill 2018, kur u denoncua se drejtues të institucioneve shtetërore në Fier po detyronin punonjësit të merrnin pjesë në një takim të Kryeministrit Edi Rama në bibliotekën e qytetit.
Sipas denoncimit të publikuar atëherë, drejtuesit e institucioneve do të verifikonin pjesëmarrjen në hyrje të aktivitetit dhe mungesat do të evidentoheshin.
Në mesazh pretendohej se punonjësit kërcënoheshin me largim nga puna nëse nuk merrnin pjesë në takim.
Statusi i Berishes: Qarkut po i detyrojne punonjesit qe te jene te pranishem ne takim. Piktori deshtak takim me detyrim! Lexoni mesazhin e nepunesit dixhital. sb “Doktor pershendetje! Ju shkruaj per te denoncuar faktin qe Edvin Shullazi ka takim te Biblioteka e Rrethit Fier, ne oren 16.00 dhe drejtoret e Bashkise Fier, UKT, OSSHE dhe ne te gjitha institucionet shteterore te Qarkut po i detyrojne punonjesit qe te jene te pranishem ne takim. Eshte e turpshme sesi kercenohen me heqje nga puna nese nuk shkojne. Drejtoret do qendrojne te hyrja e Bibliotekes ne oren 16.00 per te bere apelin, me mungesa. Kush nuk vjen, te henen merr leter per largim nga puna ! Qytetaret nuk e duan me narkokryeministrin dhe prandaj ai merr masa qe mos ti deshtoje aktiviteti, dhe ti hedhe hi syve popullit me propagande komuniste. TURP TURP TURP!”
PRILL 2021 – Padia e PD në SPAK për presion ndaj administratës
Në prill 2021, Partia Demokratike depozitoi një kallëzim në SPAK ndaj Kryeministrit Edi Rama, duke e akuzuar për presion ndaj administratës publike në prag të zgjedhjeve parlamentare.
Sipas PD-së, deklaratat e Ramës ndaj punonjësve të arsimit dhe shëndetësisë përbënin kërcënim dhe shantazh politik, duke lidhur vendin e punës me mbështetjen elektorale për Partinë Socialiste.
Opozita kërkoi hetim për disa vepra penale, mes tyre shpërdorim detyre, korrupsion në zgjedhje, përdorim të funksionit publik për qëllime politike dhe kanosje të pjesëmarrësve në zgjedhje.
27 KORRIK 2022 – SMS për administratën para aktivitetit të Ramës në Tiranë
Një nga rastet më të përfolura u denoncua më 27 korrik 2022, kur u publikua një mesazh që u ishte dërguar punonjësve të administratës publike për pjesëmarrje në aktivitetin e organizuar në Sheshin Skënderbej me rastin e 100-vjetorit të marrëdhënieve Shqipëri-SHBA dhe hapjes së negociatave me Bashkimin Europian.
Në mesazh kërkohej që drejtuesit të dërgonin listat me emra, mbiemra dhe numra telefoni të punonjësve, ndërsa pjesëmarrja cilësohej si “e detyrueshme dhe e domosdoshme”.
Për pjesëmarrësit ishte parashikuar edhe transport me autobusë drejt Tiranës.
