Gjykata e Apelit të Posaçëm ka lënë në fuqi masën e arrestit me burg për ish kryetarin e bashkisë së Himarës Jorgo Goro, i cili u arrestua në muajin mars të këtij viti për shpërdorim detyre.
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Igerta Hysi, sot më 30.04.2024, shpalli vendimin mbi çështjen penale nr. 17 akti, datë 25.04.2024 regjistrimi, mbi ankimet e personave nën hetim J.G. dhe B.A., me objekt: “Ankim ndaj vendimit nr. 31, datë 23.03.2024, verifikuar me vendimin nr. 34, datë 26.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar”, disponuar në lëndë të masave të sigurimit personal, dhe vendosi:
Miratimin e vendimit nr. 31, datë 23.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar, të verifikuar me vendimin nr. 34, datë 26.03.2024 të së njëjtës gjykatë, për pjesën e ankimuar nga personat nën hetim J.G. dhe B.A”,- thuhet në njoftim.
Kujtojmë se Jorgo Goro u arrestua më 24 mars 2024, për veprën penale “Shpërdorimi i detyrës”, kryer në bashkëpunim, në dy raste. Një nga rastet që prokuroria ka gjetur shkelje në ushtrimin e detyrës nga Jorgo Goro është toka prej 5512 m2 e sekuestruar më herët me urdhër të SPAK, që është përdorur nga bashkëshorti i ish-ministres Olta Xhaçka, për të përfituar statusin e investitorit strategjik. Në këtë rast, sipas akuzës, Goro ka shpërdoruar detyrën duke mos verifikuar dokumentet e tokës, që është tjetërsuar nga tokë shtet, në favor të një tjetër personi me dokumenta fasle dhe më pas është shitur te biznesi i Artan Gaçit.
Rasti tjetër lidhet me një sipërfaqe toke prej 5080 m2. Goro akuzohet se ka shpërdoruar detyrën në tjetërsimin e tokës, për një pjesë të së cilës është dhënë më pas leje për të ndërtuar një kompleks turistik.
Stavri Mëhilli, përfituesi me letra false të tokës që iu shit bashkëshortit të ish-ministres së Mbrojtjes, Olta Xhaçka dhe Jerasimo Bashi, me detyrë Drejtor i Drejtorisë së Mbrojtjes dhe Menaxhimit të Tokës, Bashkia Himarë, në kohën e ngjarjes, janë ende në kërkim policor.
LEXO EDHE:
