Ekspertiza e vdekjes së Brian Spahiu, i mituri që ndërroi jetë pas ndërhyrjes kirurgjikale në klinikën dentare të mjekut Roland Xhaxho, do të kryhet nga një grup mjekësh italianë.
Ekspertët e Institutit të Mjekësisë Ligjore dolën në përfundimin më herët se shkaku i vdekjes ka qenë dhënia e lëndës anestetike.
“Shkaku i vdekjes ka qenë dhënia e lëndës anestetike që ka sjellë vuajtjen qelizore të thellë me mekanizmin e insuficiencës multiorganore të parikthyeshme”, thuhej në akt-ekspertizën që daton më 11 nëntor të vitit të kaluar.
Megjithatë Prokuroria e Tiranës, deklaroi se akti i lartpërmendur është i paplotë dhe konkluzioni i pasaktë. Prokuroria kërkoi kryerjen e një akt tjetër ekspertimi, por jashtë Shqipërisë me argumentin se mungojnë ekspertët për të dhënë përgjigje për të gjitha pyetjet, dhe mësohet se do të jenë një grup mjekësh italianë ata që do të përcaktojnë shkakun e saktë të vdekjes së vogëlushit.
Kujtojmë se 3-vjeçari humbi jetën në reanimacionin e pediatrisë më 1 tetor të vitit të kaluar, 3 ditë pasi kreu ndërhyrjen kirurgjikale te dentistja Ina Xhaxho për mbushjen e 14 dhëmbëve. Ka qenë babai i saj, Roland Xhaxho që ka kryer anestezinë dhe të dy babë e bijë u akuzuan për“Neglizhencë në trajtimin mjekësor”.
