Një shtetas italian është arrestuar ditën e sotme nga Policia në Portin e Durrësit, dhe një shtetas shqiptar është vënë nën hetim pasi akuzohen për trafik armësh dhe mosdeklarim të ardhurash.
Në pranga ka rënë shtetasi Giovanni Bedini, 66-vjeç, i cili është kapur me armë zjarri automatik dhe municion luftarak.
Ndërsa hetimi ka nisur për 31 vjeçarin Ergit Haka për veprën penale “Mosdeklarimi në kufi i të hollave dhe i sendeve me vlerë”. Haka është kapur me 16 300 euro dhe 100 paund, të padeklaruara.
Si armët e zjarrit ashtu edhe paratë janë sekuestruar nga Policia.
“Shërbimet e Policisë Kufitare të portit të Durrësit, në vijim të kontrolleve në hyrje/dalje, të bazuara në analizën e riskut, me fokus parandalimin dhe goditjen e paligjshmërive kufitare, kanë goditur një rast të tentativës për trafikim të armëve të zjarrit, në dalje të RSh-së, dhe një rast të mosdeklarimit të parave, në hyrje.
Për këto raste, veprimet hetimore dhe procedurale janë kryer nga specialistët për Hetimin e Krimeve të Drejtorisë Vendore për Kufirin dhe Migracionin Durrës, të cilët kanë arrestuar në flagrancë shtetasin G. B., për veprën penale “Trafikimi i armëve dhe municionit”, si dhe kanë referuar materialet në Prokurori ku ka nisur procedimi në gjendje të lirë për shtetasin E. H., për veprën penale “Mosdeklarimi në kufi i të hollave dhe i sendeve me vlerë”,- thuhet në njoftimin e Policisë.
Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
