Palët politike duket se kanë gjetur dakordësinë “Për Dhënien e Amnistisë Penale”, projekt-ligj i cili pritet të miratohet këtë të enjte në Kuvend.
“Drita jeshile” u dha ditën e djeshme pas mbledhjes së grupit parlamentar të Partisë Demokratike, i cili propozoi disa ndryshime të versionit fillestar në Kuvend, të cilat u pranuan nga mazhoranca dhe u përshëndetën nga Ministri i Drejtësisë, Ulsi Manja.
Pika e parë e propozimit lidhej me ndryshimin e datës, ku falja të bëhet edhe për të dënuarit, nisjes së hetimeve apo kryerjes së veprës penale deri më 31 Mars. Po ashtu, PD propozoi që të përjashtohen nga vuajtja e dënimit dhe ndjekja penale të gjithë personat e gjykuar apo hetuar për vepra penale të kryera gjatë protestave.
Pika më e diskutueshme lidhet me ndryshimet në nenin 5, ku përfshihen edhe subjekte të Gjykatës së Posaçme kundër Korrupsionit dhe Krimit të Organizuar. Amendamenti i grupit parlamentar të PD-së përjashton nga përfitimi një grup funksionesh kushtetuese, të tillë si presidenti, kryeministri, ministra, zëvendësministra, deputetë dhe funksionarë të tjerë të lartë të drejtësisë e të ngjashme, por lejon uljen e dënimit për një seri veprash penale në kompetencë të GJKKO-së për zyrtarë të tjerë të nivelit të lartë, gjyqtarë, prokurorë apo persona fizikë të dënuar për korrupsion, abuzim me tenderat dhe të ngjashme.
Ky ndryshim në projektligj u jep ulje me 1 vit e gjysëm burg të dënuarve burra nga Gjykata e Posaçme dhe me 2 vit e gjysëm burg të dënuarve gra dhe të mitur nga e njëjta gjykatë, me kushtin që ata të mos mbajnë apo të mos kenë pasur kur kanë kryer veprën penale funksionet përjashtuese.
Veprat penale që përfitojnë ulje dënimi
- Neni 244, Korrupsioni aktiv i personave që ushtrojnë funksione publike
- Neni 245, Korrupsioni aktiv i funksionarëve të lartë shtetërorë ose të zgjedhurve vendorë
- Neni 245/1, Ushtrimi i ndikimit të paligjshëm ndaj personave që ushtrojnë funksione publike
- Neni 257/a, Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë…
- Neni 258, Shkelja e barazisë së pjesëmarrësve në tendera apo ankande publike
- Neni 259, Korrupsioni pasiv i personave që ushtrojnë funksione publike
- Neni 259/a, Korrupsioni pasiv i nëpunësve të huaj publikë,
- Neni 260, Korrupsioni pasiv i funksionarëve të lartë shtetërorë ose i të zgjedhurve vendorë
- Neni 312, Korrupsioni aktiv i dëshmitarit, i ekspertit ose përkthyesit
- Neni 319 Korrupsioni aktiv i gjyqtarit, prokurorit dhe i funksionarëve të tjerë të drejtësisë dhe pikat pasuese të tij.
Ndërkohë, në seancën e sotme plenare do të futen në rend dite për votim 5 ligjet e seancës së 7 marsit, votimi i të cilave u anulua nga Sekretariati i Etikës pas kërkesës së Rithemelimit se nuk pati kuorum për votimin e ligjeve. Ndër këto 5 ligje, përfshihet edhe ai për zgjatjen me 1 vit të afatiti për ligjet për investimet strategjike, çështje të cilën opozita e ka kontestuar shumë.
Gjithashtu, në seancën e sotme plenare deputetja Ina Zhupa ka kërkuar një interpelancë me ministren e Turizmit, Mirela Kumbaro për ligjin për zonat e mbrojtura, i cili hap rrugë betonizimit dhe shkatërrimit të këtyre zonave.
