Belind Këlliçi, anëtar i kryesisë së PD-së, duke folur në ditën e 93 të tubimit qytetar në mbështetje të liderit të opozitës Sali Berisha tha se kreu demokrat nuk është tërhequr për asnjë sekondë dhe ka denoncuar në çdo moment aferat e Edi Ramës.
Këlliçi tha se ndërsa Sali Berisha ndodhet në arrest sepse ka denoncuar aferat e Edi Ramës, i njëjti SPAK mban në qetësi Edi Ramën në Kryeministri dhe banditin Erion Veliajn në Bashki.
“SPAK ka frikë ti përmendë emrin jo vetëm Edi Ramës, por edhe Erion Veliajt”, tha Këlliçi.
“Erion Veliaj nuk ka zot që të shpëton nga dosja ‘5D’ dhe inceneratori i Tiranës. Nuk ka zot që e shpëton Veliajn, nga çjerrja e maskës mbi atë që ka ndodhur me taksat e qytetarëve. Erion Veliaj do të paguajë faturën deri më një. Erion Veliajt do ti ngremë një lapidar atje në Sharrë për t’I treguar se gjaku i Ardit Gjoklajt nuk ka për tu harruar kurrë. Erion Veliaj ka vjedhur plot 130 mln euro nga taksat tuaja deri më tani me një incinerator fantazëm”, tha Këlliçi.
Ai ka ftuar qytetarët e Tiranës që të marrin pjesë në protestën e orës 11:00 të ditës së premte, ndërsa tha se çdo qytetar i kryeqytetit duhet ti kërkojë llogari Erion Veliajt se ku kanë shkuar taksat e shqiptarëve.
“Ashtu si opozita mundi në Turqi, Erdoganin, ashtu do të fitojmë edhe ne me në krye Sali Berishën, në zgjedhjet e ardhshme. Banda qeverisëse dhe ajo në bashki do të përgjigjen deri më një”, tha Këlliçi.
