Raportuesja për Shqipërinë në Parlamentin Europian, Isabel Santos deklaroi dje se është e keqardhur nga deklaratat e Greqisë për Fredi Belerin. Duke folur në MCN, politologu Ilir Kalemaj e konsideroi deklaratën si korrekte, ku u theksua se Athina s’ka të drejtë të ndërhyjë në çështjet e brendshme të një shteti sovran.
Gjithashtu, Kalemaj tha se Santos, si një anëtare e grupit Eurosocialist, është më e zbutur për kritikat ndaj qeverisë, edhe pse nuk munguan shigjetimet për ligjin për zonat e mbrojtura.
“Deklarata e znj.Santos ishte deklaratë korrekte, ajo që tha ishte nuk mund të arrihet në kondicionaliste të tilla në marrëdhëniet ndërshtetërore, kur drejtësia s’e ka thënë fjalën e fundit dhe bëhet fjalë për një vend i cili presupozohet se është vend kandidat për në BE, dhe presupozohet të ketë kornizën e asaj që njihet si shtet i së drejtës. E cila u pasua nga një deklaratë e ministrit të Jashtëm grek Dendias, që tha se kjo nuk është një çështje e marrëdhënieve ndërshtetërore Shqipëri-Greqi, por është një çështje e marrëdhënieve që ka Shqipëria me BE, me respektimin e të drejtave të njeriut, në lidhje me ndarjen dhe balancat e pushteteve. Ajo që i bashkon këto prononcime është që Greqia s’ka të drejtë të ndërhyjë në aferat e brendshme të një shteti sovran”.
Znj.Santos flet si një anëtare e grupit Eurosocialist, dhe për këtë është më e zbutur për kritikat ndaj qeverisë, edhe pse nuk munguan shigjetimet për ligjin për zonat e mbrojtura. U vu në pikëpyetje një element që mbrohet edhe me Kushtetutë, edhe me Konventën e Bernës. Pashë ligjin edhe thuhej ‘5 e më shumë yje’, po pse sa do vijnë këtu 11 yje?! Sazani ka të mirat e veta dhe mund të diskutohet, por zona që ha më shumë debat është Zvërneci, dhe flamengot” – tha ai.
I pyetur mbi reformën zgjedhore, Kalemaj tha se nëna e problemeve në Shqipëri është mos hapja e garës, që bën që deputetët t’u jenë besnikë vetëm kryetarëve të partive dhe të shkëmbehen si “në merkaton e gjësë së gjallë”.
“Kjo është çështje e vullnetit politik të dy aktorëve politik që ka Shqipëria. Nëse i referohemi raporteve të OSBE-ODIHR, dhe deklaratave të Isabel Santos këto nuk zgjidhin asgjë. Problemi në Shqipëri nuk ka qenë politizimi i administratës zgjedhore, por kemi shkuar te elementi i shit-blerjes së votës, përdorimi i administratës publike dhe patronazhistëve. Nëna e problematikës këtu është që të hapet gara. Në Shqipëri nuk ka garë, nga 2008 e deri tani, janë dy kryetarë që bëjnë listat dhe këta besnikërinë e kanë ndaj kryetarëve të partisë. Ka vdekur përfaqësimi politik, dhe demokracia vazhdon të jetë hibride, dhe vazhdojmë të kemi këtë problem ku deputetët shkëmbehen si në merkaton e gjësë së gjallë dhe bëjnë kapërcime 180 gradë në harkun e pak muajve. Në momentin që adresohet kjo çështje themeltare, qoftë përmes mazhoritarit të korrektuar me proporcional kombëtar siç e kishim, qoftë me proporcional kombëtar me lista të hapura siç e kërkon një pjesë e mirë e opozitës, unë mendoj se janë hapat në drejtimin e duhur. Duhet një komision auditi, me përfaqësues nga shoqëria civile, media, akademia, që të vlerësojë sa shpenzojnë partitë në zgjedhje ” – tha Kalemaj.
