Sekretari i Përgjithshëm i PD-së, Flamur Noka, ka sjellë edhe njëherë në vëmendje largimin e të rinjve nga vendi, duke akuzuar si përgjegjës kryeministrin Rama.
Gjatë takimit me qytetarët në Mat, Noka tha se është shumë e dhimbshme që në çdo fshat e qytet të shohësh të moshuar, sepse rinia ka ikur.
“Kur zbret qafën e Murrizit për të ardhur drejt jush, syri sheh panorama të mrekullueshme, shef tek tuk edhe kulla të vjetra, shef tek tuk edhe banesat e reja, por është e vështirë të shikosh shpresë në fytyrat e çdo qytetari matjanë dhe kudo qoftë.
Kur nuk kishte ndodhur në 33 vjet, që të shohësh në malësi fytyra të vrara dhe që kanë humbur shpresën. E gjithë kjo e keqe ka vetëm një emër, është Edi Rama. Ka vetëm një sekt politik, dhe ky sekt është Rilindja”, tha Noka.
Ai shtoi se në këto 10 vjet është harruar që në Mat të flitet për mirëqënie, vende pune, është harruar që të flitet për rritje rrogash e pensionesh. “Në Shqipëri nuk ka qeverisje, por ka regjim kriminal, kleptokratik, që ka vetëm një mision të vjedhë, të dënojë, të vjedhë votat dhe qytetarin të mos e trajtojë me dinjitet”, tha Noka.
Noka u shpreh më tej se Rama ka vetëm një rrugë. Qytetarët të ngrihen dhe ai të gjunjëzohet e ti hapë rrugë votës së lirë.
“Edi Rama ka vetëm një rrugë, të ngrihemi dhe ta detyrojmë të gjunjëzohet, të ngrihemi dhe ta detyrojmë që të lëshojë vendin dhe ti hapë rrugë një procesi të ndershëm demokratik zgjedhor, ti hapë rrugë votës së lirë. Që të ndodhë kjo duhet qeveri teknike. Ky është mision ynë, misioni i çdo demokrati dhe ne këtë mision ne nuk do ndalemi, ne këtë mision do ta arrijmë.
