“Nuk do kursejmë askënd” Kështu është shprehur kreu i Prokurorisë së Posaçme, Altin Dumani, i pyetur se deri ku do të shkojë SPAK në kupolën e zyrtarëve të lartë.
Gjatë fjalës së tij në takimin që po mbahet ditën e sotme pa praninë e kamerave, të nismës më të re të dialogut mes institucioneve dhe aktorëve të politikëbërjes, “IDM Morning Briefing”, Dumani është shprehur se SPAK po vijon punën për hetimin e zyrtarëve të lartë të korruptuar dhe krimit të organizuar.
“Për vitet e ardhshme duhet të besojmë që kemi një institucion të konsoliduar me hetime dhe vendime ndaj të gjitha niveleve. Është e vështirë, por jo e pamundur. Rezultatet na stimulojnë dhe na nxisin që të punojmë akoma më shumë”, tha kreu i SPAK.
I pyetur nga pjesëmarrësit në lidhje me ngritjen e një komision parlamentar të propozuar nga PS, ku është përfolur se do të monitorojë edhe SPAK, Dumani tha se kjo gjë nuk do të ndodhë dhe është në kuadrin e thashemethemeve. Ai shtoi se nuk ka parë asnjë dokument, teksa shprehet se Prokuroria e Posaçme është institucioni më i kontrolluar në vend.
Ndër të tjera, Dumani theksoi dhe se është e paimagjinueshme të bësh ndryshime në reformën në drejtësi kur reforma vazhdon ende.
“Pavarësisht se çfarë flitet dhe thuhet, ne realisht nuk kemi ende një dokument që të lexojmë dhe të shikojmë se cila do të jetë qasja lidhur me reformën në drejtësi. Këtu për të bërë ndryshime e për të ngritur komisione, por përsa kohë nuk ka një dokument, nuk kam një qëndrim. Nëse do të ndodhë, patjetër do të kemi reagim institucional. Për mendimin tim, është e paimagjinueshme të bësh ndryshime në reformën në drejtësi kur reforma vazhdon ende.
Vetting-u s’ka mbaruar ende. KLGJ, KLP janë ende të pakonsoliduar. SPAK ka nevojë dhe për dy prokurorë. Para se të shkosh atje, duhet bërë një analizë. Por, kjo është në kuadrin e thashethemeve, sepse s’kam parë ende dokument. Ndaj s’kam qëndrim.
SPAK është institucioni më i kontrolluar në republikë, më i kontrolluari. Në aspektin procedurial, kontrollohemi nga tre shkallë, mos harrojmë gjyqtarin paraprak, çdo gjë bëhet me vendim gjykate. Ne raportojmë në Komisionin e Ligjeve atje, ka diskutime e debate. Kjo është marrëdhënia me parlamentin. KLP e raportojmë atje. ILDKPI kontroll pasuritë”, ka thënë Dumani.
