Nga Boldnews.al
Lajmi i ri, si “dhallë taze” i dalë nga dybeku i Parlamentit, ishte se më në fund PS e Ramës pranoi të ngrihen dy komisione hetimore parlamentare, por me kusht që vetëm kryeministri të mos preket.
“Kemi rënë dakord në parim për ngritjen e Komisionit Hetimor për kontratat koncesionare korruptive në sektorin e shëndetësisë dhe për ngritjen e Komisionit Hetimor për ndërhyrjen në të dhënat personale në sistemin TIMS”-tha Gazmend Bardhi, kreu i Grupit Parlamentar të PD-së.
Me këtë “lëshim” të mazhorancës, pritet që opozita të kthehet në gjoja normalitet, pas pesë muajsh absurdi të shkaktuar pikërisht nga mohimi i të drejtës së opozitës për të ngritur komisione hetimore parlamentare për çështje të ndryshme.
Nga tetë komisione të kërkuara vetëm dy janë pranuar, duke refuzuar që kryeministri të hetohet për udhëtimet me avionë çarter, apo edhe për lejet e dhëna për “investitorët strategjikë”. Rama fitoi, por si një person i frikësuar jo më shumë nga opozita, por nga vetja dhe paranoja se nëse i hapet kapaku i atij blloku të frikshëm abuzimesh, imazhi do i bjerë përdhe… Çdokush që është në pushtet kur i zbulohet një aferë ka frikë nga drejtësia, por paradoksalisht, Rama ka frikë vetëm nga vetja, pasi edhe drejtësinë e re e ka kthyer si një zyrë dytësore të kryeministrisë.
Frikë nga ligji nuk ka, frikë nga opozita jo, nga protestat gjithashtu jo, por i vetmi mankth për të është çështja e prishjes së mundshme të imazhit dhe propgandës. Marrëveshja e sotme nxorri të fituar Ramën, duke mos lejuar të vihet në kandar vetëm koka e tij dhe e një grupi të vogël oligarkësh, për të bërë të paprekshëm treshen pushtet-krim-biznes. Opozita thotë se “mori shumë”, të paktën dy nga tetë komisionet hetimore të kërkuara, duke u mjaftuar me një pjesës të asaj çfarë i vodhën.
Tradicionalisht komisionet hetimore Parlamentare nuk kanë sjellë ndonjë zbulim të madh, por në rastin e inceneratorëve ishte tërësisht ndryshe. Rama dhe enturazhi i tij, përfshi edhe kryebashkiakun Erion Veliaj u shkërmoqën moralisht teksa në këtë komision dilnin fakte të rënda të përfshirejes në këtë abuzim të tmerrshëm që ha çdo ditë qindra mijëra euro të taksave qytetare.
E pakuptimtë është bërtitja e opozitës se fituan. Në fakt nuk ka fituar asgjë, pasi i ngjan një qytetari që i kanë vjedhur shtëpinë dhe hajduti i kthen nja “dy orendi”, me një marrëveshje që të mos hetohet as ligjërisht nga SPAK e as politikisht në Parlament.
Sot Rama ka të drejtë të festojë një fitore të madhe si një i frikësuar po aq i madh nga hija e tij. Nga ana tjetër opozita vëtëkënaqet me një lëshin minor të asaj çfarë i takon. Po ashtu edhe ndërkombëtarët duatrokitën marrëveshjen më absurd të arritur ndonjëherë, pasi për ta e rëndësishme është stabilokracia në një vend që demokracia është një e vdekur e pakallur.
