Një 17-vjeçar është arrestuar nga Policia në Tiranë, pasi është kapur me drogë.
Policia sqaron se të riut (banues në Durrës) i janë gjetur në çantë gjatë kontrollit 4000 fara kanabisi, të cilat do ti shiste në Tiranë tek shtetas të tjerë apo bashkëmoshatarë.
“Specialistët për Hetimin e Narkotikëve në DVP Tiranë, si rezultat i administrimit të shpejtë të informacioneve nga inteligjenca policore, të siguruara në vijim të megaoperacionit “Tempulli 2”, për një shtetas i cili transportonte fara kanabisi, me qëllim shitjen kanë organizuar dhe finalizuar operacionin policor të koduar “Furnizuesi”.
Si rezultat u arrestua në flagrancë një shtetas 17 vjeç, banues në Durrës.
Gjatë kontrollit fizik dhe çantës së tij, shërbimet e Policisë i gjetën dhe sekuestruan sasi farash të dyshuara narkotike kanabis (4000 fara)”,- thuhet në njoftimin e Policisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
