Hetimi i hapur nga Prokuroria e Milanos rreth situatës së klubit të Milanit dhe pronësisë së tij, kanë shkaktuar jo pak kaos te kuqezinjtë, të cilët ishin të papërgatitur për një ngjarje të tillë.
Policia bastisi zyrat e klubit, por edhe banesat e drejtuesve dhe ish-drejtuesve kuqezinj duke kërkuar të dhëna pasi dyshohet se “Elliott” vazhdon të jetë pronari efektiv i klubit dhe jo “RedBird” siç është deklaruar që nga gushti i vitit 2022.
Pikërisht kompania “RedBird” ka reaguar nëpërmjet një komunikate për shtyp të shpërndarë sot, duke bërë të qartë se hidhte poshtë të gjithë akuzat, ashtu si edhe aludimet në media se nuk kishte kontrollin e aksioneve në klub.
“RedBird Fund IV dhe personat e tij firmëtarë zotërojnë 99,93% të AC Milan; pjesa e mbetur 0,07% është në dorë të aksionerëve të veçantë italianë që janë tifozë të vjetër të klubit. Ideja që “RedBird” nuk zotëron kontrollin e AC Milan, është absolutisht false dhe kundërshtohet nga të gjitha provat dhe faktet, përfshirë ato që aludohet se janë në themelet e hetimit.
Kur kemi marrë kontrollin pas mbylljes së negociatave, “Elliott” i siguroi një hua kompanisë “RedBird” me skadencë pas tre vitesh pa asnjë të drejtë vote. Nuk jemi në diskutime me asnjë investitor që mund të ketë kontrollin mbi klubin. RedBird është pronari i kontrollues i AC Milan dhe do të mbetet i tillë”, shkruhej në komunikatën e shpërndarë për mediat.
Gjatë ditës së sotme, mediat italiane publikuan lajmin e bujshëm se fondi saudit PIF, që varet nga familja mbretërore, do të blinte 47% të aksioneve të klubit, duke u bërë një nga aksionerët më të rëndësishëm të kuqezinjve.
