Ish-ministrit dhe ish-deputeti i LSI-së (sot PL) Vangjel Tavo është emëruar prefekt i Qarkut të Vlorës. Vendimi që mban firmën e kryeministrit Edi Rama është marrë këtë të mërkurë në mbledhjen e qeverisë.
Disa javë më parë, emri i Tavos u raportua nga mediat greke si i zgjedhuri i Ramës për tu projektuar në krye të bashkisë së Himarës. Zërat u mohuan më pas nga kreu i qeverisë.
Tavo zëvendëson në këtë detyrë Flamur Mamajn. I emëruar prefekt i Qarkut të Vlorës më 2017-ën, ai është liruar nga detyra me një vendim të Këshillit të Ministrave ditën e sotme.
Po ashtu, në mbledhjen e sotme, është liruar nga detyra prefektja e Fierit Rajmonda Balilaj, e cila u pezullua nga detyra nga GJKKO më herët gjatë muajit. Ajo është nën hetim nga SPAK për veprën penale “Shkelja e barazisë së pjesëmarrësve në tendera apo ankande publike”. Balilaj akuzohet se gjatë kohës që drejtonte Bashkinë Patos paracaktoi fituesin në dy tendera të një kompanie që i kryente punimet që para se të zhvillohej tenderi.
Vendimet e lirimieve dhe emërimit në detyrë janë propozuar në mbledhjen e qeverisë nga ministri i Brendshëm, Taulant Balla.
