Deputetja e Partisë Demokratike, Dhurata Çupi, ka komentuar mirëkuptimin e arritur mes mazhorancës dhe opozitës për rikthimin e normalitetit në Kuvend.
E ftuar në Syri TV, Çupi u shpreh se nuk është ndonjë favor, por thjeshtë pranim nga ana e PS-së se vendi ka një opozitë dhe asaj i takojnë të drejtat e saj.
‘Sot nuk kemi as favor, as dhurim të mazhorancës për opozitën, por sot ka një pranim të mazhorancës që Shqipëria ka opozitë, ka një grup opozitar parlamentar dhe instrumentet e parlamentarizmit që i garanton Kushtetuta, janë të detyruar ti zbatojë mazhoranca.
Fakti që në 6 muaj mazhoranca nuk ja doli të thyejë protestën dhe qëndresën tonë dhe të drejtave të opozitës, e detyroi mazhorancën që të pranojë atë që kërkonim ne.
Komisionet hetimore janë një e drejtë kushtetuese dhe që i garanton edhe rregullorja.
Edhe deklarata e Ambasadës së SHBA dhe kontaktet me partnerët ndërkombëtar kanë qenë të vazhdueshëm.
Unë kam qenë një nga ato që kemi takuar dhe kërkuar këtë që e themi në media, e kemi kërkuar edhe nga ndërkombëtarët.
Nuk është favor, dhuratë, apo pakt, por është një e drejtë që i takon opozitës dhe që do ta merrte patjetër’, tha Çupi.
