Dy shtetas shqiptarë janë arrestuar një ditë më parë nga Policia në Greqi, pasi janë kapur me rreth 80 kilogramë drogë. Bëhet fjalë konkretisht për shtetasit Aristidhi Lulëzim Dalipi, 24 vjeç me kombësi shqiptare e shtetësi greke dhe Amarildo Jakup Omeri, 35 vjeç nga Fieri.
Dy të rinjtë fillimisht tentuan t’i arratisen policisë greke me një automjet, por u ndaluan pasi u përplasën me një automjet tjetër të parkuar.
Sipas burimeve policore, gjatë ndjekjes një prej drejtuesve të operacionit ka hapur zjarr paralajmërues. Pasi kanë braktisur mjetin me 4 çantat me drogë, dy shqiptarët janë larguar me vrap, por më pas janë prangosur
Mediat vendase raportojnë se pronar i automjetit rezulton vëllai i Dalipit, shtetasi Dhionisios Lulëzim Dalipi, aktualisht i burgosur në Koridhalo.
Hetimet paraprake po kryhen nga Prokuroria e Narkotikëve në Igumenicë, ndërsa dy të arrestuarit pritet të dërgohen në Prokurorinë e Thesprotisë.