Në rreth 7 minuta, socialistët në Kuvend miratuan dy nisma të rëndësishme dhe kundërshtuara zëshëm si marrëveshja Rama-Meloni për refugjatët dhe ndryshimet në ligjin për zonat e mbrojtura.
Seanca nisi me tensionet e zakonshme që janë shfaqur gjatë javëve të fundit që prej përshkallëzimit të aksionit opozitar nga ligjvënësit e opozitës.
Mes zhurmës së bilbilave të deputetëve të opozitës, kryeparlamentarja Lindita Nikolla zgjodhi skemën e zakonshme duke kaluar direkt në votim projektligjet në rendin e ditës dhe anashkaluar diskutimet.
Një prej tyre ishte marrëveshja Rama-Meloni që parashikon strehimin në vendin tonë të refugjatëve që kapen nga autoritetet italiane në Mesdhe. Përveç 74 votat e mazhorancës, nisma mori edhe mbështetjen e deputetëve të PDIU-së duke marrë përfundimisht 77 vota pro, asnjë kundra dhe asnjë abstenim. Deputetja e PDIU-së, Mesila Doda tha për gazetarët pas seancës, se me këtë qëndrim, po ndihmohet një shtet mik si Italia që sipas saj, i ka qëndruar pranë Shqipërisë në momente të vështira.
PDIU nuk votoi ndryshimet e qeverisë në ligjin për zonat e mbrojtura, por la të hapur mundësinë se mund të bashkojë votat me PS edhe për amnistinë penale. Projektligji për amnistinë u tërhoq nga socialistët në Kuvend pasi nuk gjetën konsensusin e nevojshëm në Kuvend për të siguruar 84 vota. 74 vota pro mori kërkesa e depozituar në Kuvend nga kreu i grupit parlamentar të PS-së Bledi Çuçi për tërheqjen e nismës.
Kujtojmë se protokolli për marrëveshjen me palën italiane për refugjatët është ankimuar në Gjykatën Kushtetuese nga opozita, megjithatë gjyqtarët kushtetues vendosën në një vendim me shumicë, në favor të qeverisë.
Nisma e dytë e kundërshtuar nga një spektër i gjerë aktorësh brenda dhe jashtë vendit që u miratua nga socialistët janë ndryshimet në ligjin për zonat e mbrojtura. Ky projektligj i qeverisë që parashikon lejimin e ndërtimeve brenda zonave të mbrojtura mori 74 vota.
Pas seancës, deputetët demokratë shprehën kundërshtitë e tyre për dy projektligjet në prononcimet e dhëna për gazetarët.
Deputetja Jorida Tabaku tha se përveçse do të sjellë një dëm të pallogaritshëm më mjedis, nisma do të fryjë xhepat e klientëve të qeverisë dhe do të dëmtojë procesin e integrimit, duke qenë se BE është shprehur publikisht kundër. Ajo tha se 14 projekte strategjike pritet të ndërtohen në zonat e mbrojtura me miratimin e nismës.
Deputetja tjetër demokrate Ina Zhupa tha se projektligji klientelist do të sjellë shkatërrimin e zonave të mbrojtura.
Qëndrimin kundër dy projektligjeve e shprehu për mediat edhe kreu i grupit parlamentar të PD-së, Gazment Bardhi. Për projektligjin për zonat e mbrojtura tha se planifikohet të gllabërohet pasuria kombëtare e shqiptarëve.
Ndërkohë, ministria e Mjedisit Mirela Kumbaro tha se për ndryshimet në ligjin për zonat e mbrojtura janë zhvilluar disa konsultime publike. Ajo u shpreh se ndërtime do të lejohen “vetëm në zonat e parashikuar brenda kritereve shumë strikte” dhe se “do të jenë të mundura të zhvillohen me 3-4 filtra disa ndërtime ekologjike dhe miqësore me mjedisin”.
Një protestë u zhvillua sot para Kuvendit kundër ndryshimeve ligjore që lejojnë ndërtimet në zonat e mbrojtura.
