Anëtarët e KPK-së kërkojnë që pas përfundimit të mandatit (në Dhjetor 2024) të emërohen gjyqtarë në Apel, sipas citimit të një letre të përpiluar nga anëtarët e shkallës së parë të vetingut dhe të publikuar nga mediat këtë të hënë.
Referuar raportimeve, anëtarët e KPK-së i kanë dërguar një kërkesë zyrtare Kuvendit, kryeministrit Edi Rama, ministrit të Drejtësisë Ulsi Manja dhe delegacionit të BE-së dhe ambasadës amerikane në Tiranë. Ata kanë kërkuar që parmës ndryshimeve ligjore të ndërmarra nga qeveria dhe Kuvendi, pas përfundimit të mandatit të tyre, të kenë mundësinë të bëhen gjyqtarë në Gjykatën e Apelit. Po ashtu, propozohet që këshilltarët me 5 vite detyrë në KPK, të pranohen në Shkollën e Magjistraturës për profilin gjyqtar dhe prokuror pa konkurrim, ndërsa ata me 4 vite eksperiencë, të emërohen hetues të BKH-së.
“Por duke qenë se viti 2024 është viti i fundit tonë, shqetësim mbetet mungesa e rregullimit ligjor të statusit të komisionerëve pas mbarimit, çka ka sjellë pasiguri juridike dhe asnjë garanci ligjore personale të anëtarëve të këtyre institucioneve kushtetuese, sikurse Kushtetuta ua njeh gjatë ushtrimit të duke i barazvlerësuar në status me anëtarin e Gjykatës së Lartë”, citohet nga media letra e anëtarëve të Komisionit të Pavarur të Kualifikimit.
Lidhur me raportimet ka reaguar Partia Demokratike, që e cilësojnë kërkesën “kthimin e favoritit që i kanë bërë pushtetit duke skualifikuar të padashurit dhe kualifikuar kandidatët e preferuar të qeverisë”.
Anëtari i Kryesisë së PD-së, Ivi Kaso u ka bërë thirrje ambasadave të BE-së dhe amerikane në Tiranës që të disnacohen nga kërkesa. “Partia Demokratike e dënon me forcë këtë farsë dhe u kërkon ambasadave të Shteteve të Bashkuara të Amerikës dhe të Bashkimit Europian që ta refuzojnë dhe të distancohen nga ky shtrembërim i parimeve të shtet bërjes dhe drejtësisë”, tha ai nga selia blu.
“Synimi i kërkesës është i qartë, shtoi Kaso, na siguroni jetëgjatësinë në sistem dhe ne do t’ju shërbejmë siç edhe e kemi bërë”.
Kaso konstatoi konfliktin e interest.
“Konflikti i parë i interesit është se anëtarët e KPK kërkojnë të mbushin pikërisht ato vende në sistem që vetë i kanë zbrazur, duke skualifikuar gjyqtarë e prokurorë të tjerë. Kjo i bën të dyshimta vendimet e tyre. Së dyti ata kërkojnë vende në sistem edhe për ndihmësit e tyre, duke e kthyer në oligarki sistemin e drejtësisë. Sipas kërkesës që i drejtojnë qeverisë, ata duan që këshilltarët në KPK, të futen në shkollën e Magjistraturës pa konkurs, pra të bëhen gjyqtarë dhe prokurorë, ose të bëhen hetues të BKH apo zyrtarë në institucione të tjera të drejtësisë së re. Me pak fjalë, ata kërkojnë shpërblimin për spastrimin politik që i kanë bërë sistemit të drejtësisë”, deklaroi.
“Kjo do të thotë që gjithë infrastruktura e drejtësisë së re të jetë në dorë të Partisë Socialiste. Nuk mund të ndodhë ndryshe kur emërimet në drejtësi i bën Edi Rama, Ulsi Manja dhe Lindita Nikolla. Partia Demokratike e ka përsëritur këtë alarm prej vitesh. Kjo është një nga provat e shumta se provat tona kanë qenë të pakundërshtueshme. Kjo është prova se me Edi Ramën nuk ka drejtësi të pavarur, por drejtësi të kapur. Kundër kësaj drejtësie që dënon popullin dhe favorizon patronazhistët të ngrihemi nesër”, përfundoi ai.
