Prokurori i posaçëm amerikan David Weiss akuzoi një ish-informator të FBI-së se kishte gënjyer për përfshirjen e Presidentit Joe Biden dhe djalit të tij Hunter Biden në marrëdhëniet e biznesit me kompaninë ukrainase të energjisë “Burisma Holdings”.
Alexander Smirnov, 43 vjeç, po përballet me akuza se ka gënjyer FBI-në dhe ka krijuar të dhëna të rreme. Ai u arrestua të enjten në Aeroportin Ndërkombëtar “Harry Reid” në Las Vegas, pas mbërritjes së tij në SHBA dhe do të bëjë paraqitjen e tij të parë në gjykatën federale të enjten pasdite.
Akuza e Smirnovit hedh poshtë një aspekt kryesor të pretendimeve të republikanëve se Joe Biden po përfitonte financiarisht nga marrëdhëniet e biznesit të djalit të tij në Ukrainë.
Sipas të dhënave të gjykatës, Smirnov i tha një agjenti të FBI-së se ai kishte folur me pronarin e “Burisma” për përpjekjet e firmës për të blerë një kompani në Shtetet e Bashkuara.
Si pjesë e raportit të tij për FBI-në, pretendon aktakuza, Smirnov gjithashtu vuri në dukje se dikush i referuar si “Biznesperson 1” ishte në bordin e Burisma dhe ishte gjithashtu djali i një individi të referuar si “Zyrtari Publik 1”. Megjithëse aktakuza nuk i identifikon këta individë, burimet identifikuan “Zyrtarin Publik 1” si Joe Biden dhe “Biznesperson 1” si Hunter Biden.
Gjatë fushatës së Joe Biden për presidencën, Smirnov dyshohet se paraqiti raporte në FBI për dy takime me drejtuesit e “Burisma” nga viti 2015 dhe 2016, gjatë të cilave drejtuesit pranuan se kishin punësuar Hunter Biden për të “na mbrojtur, nëpërmjet babait të tij, nga të gjitha llojet e problemeve”. Smirnov gjithashtu dyshohet se ka raportuar se drejtuesit kanë paguar 5 milionë dollarë secili për Joe dhe Hunter Biden, ndërsa Joe Biden ishte zëvendëspresident në mënyrë që Hunter “të kujdeset për të gjitha ato çështje nëpërmjet babait të tij”, duke iu referuar një hetimi penal që po kryente asokohe kryeprokurori ukrainas për “Burisma”.
“Në të vërtetë dhe faktikisht, i pandehuri kishte kontakte me drejtuesit nga Burisma në vitin 2017, pas përfundimit të administratës Obama-Biden dhe pasi Prokurori i Përgjithshëm i atëhershëm ukrainas ishte shkarkuar në shkurt 2016, me fjalë të tjera, kur [Joe Biden] nuk kishte asnjë aftësi për të ndikuar në politikën e SHBA-së dhe kur Prokurori i Përgjithshëm nuk ishte më në detyrë”, thuhet në aktakuzë.
“Me pak fjalë, i pandehuri i transformoi kontaktet e tij rutinë dhe të jashtëzakonshme të biznesit me Burisma në vitin 2017 dhe më vonë në akuza për ryshfet kundër [Joe Biden], kandidatit të supozuar të njërës prej dy partive kryesore politike për President, pasi shprehu njëanshmëri kundër [Joe Biden] dhe kandidaturën e tij”, thuhet më tej në akt-akuzë.
/CNN/
