Lefter Maliqi foli rreth dorëheqjes së papritur të Admir Abriajt nga posti i Drejtorit të Përgjithshëm të Burgjeve.
I pyetur nga gazetari Albi Rakip se përse ka ndodhur kjo, duke ditur që Abriaj ka mbajtur poste të rëndësishme ndër vite, Maliqi dha këtë përgjigje:
“Burgjet janë një minierë ari. Drejtori i Përgjithshëm e ka marrë këtë postë për shkak të interesave të mëdha. Në burgje ke çdo ditë tendera ushqimesh, telefonish fikse, ilaçesh e të tjera me radhë. Aty abuzohet me transferimin e të burgosurve, ke abuzimet me lejet që u jepen atyre. Kemi parë persona që janë dënuar me burgim të përjetshëm, që janë liruar për të marrë pjesë në fushata. Kam vënë duart në kokë kur dëgjova për vrasjen në burgun e sigurisë së lartë. Kjo është qesharake. Në një burg të sigurisë së lartë të hyjë një armë. Atë ditë duhet të ishte larguar me shkarkim drejtori, por morën në qafë persona të tjerë nga rangu i policisë”, tha Maliqi.
“Çuditërisht, dëgjojmë për dorëheqjen e Drejtorit të Përgjishëm të Burgjeve. Kjo është një dorëheqje e detyruar, jo e vullnetshme. Këtu drejtojnë oligarkët dhe mafia”, shtoi ai.
