Shefi humanitar i OKB-së, Martin Griffiths, ka shprehur shqetësimin e tij për operacionet ushtarake në Rafah, duke theksuar se ato “mund të çojnë në një masakër”. Ai ka shtuar se “historia nuk do të jetë e mirë” nëse Izraeli injoron paralajmërimet nga komuniteti ndërkombëtar kundër “pasojave të rrezikshme të çdo pushtimi tokësor”. Griffiths, nënsekretari i përgjithshëm për çështjet humanitare dhe koordinatori i ndihmës emergjente, ka bërë të ditur se kjo situatë mund të lërë një “operacion humanitar tashmë të brishtë në derën e vdekjes”.
“Skenari të cilit i kemi frikë prej kohësh po zbërthehet me shpejtësi alarmante”, tha Griffiths.
“Më shumë se gjysma e popullsisë së Gazës – mbi një milion njerëz – janë të stërmbushur në Rafah, duke parë vdekjen në sy. Ata kanë pak për të ngrënë, vështirë se kanë akses në kujdesin mjekësor, askund për të fjetur, askund të sigurt për të shkuar.
“Ata, si e gjithë popullata e Gazës, janë viktima të një sulmi që është i pashembullt në intensitetin, brutalitetin dhe shtrirjen e tij.”
Izraeli ka thënë vazhdimisht se bën gjithçka që është e mundur për t’i larguar civilët nga rreziku dhe këmbënguli se një plan evakuimi do të jetë pjesë e operacionit ushtarak në Rafah.
