Analisti Baton Haxhiu, ka komentuar mbledhjen e Grupit Parlamentar të Partisë Demokratike, që u mbajt me dyer të mbyllura këtë të hënë në Tiranë.
I ftuar në ‘Çim Peka LIVE’ në SYRI TV, Haxhiu është shprehur se ky bashkim i PD-së është mekanik.
Sipas tij, ky bashkim ka ende paqartësi, për shumë gjëra se si do të vazhdohet.
Haxhiu: ‘Do të ishte lajm i mirë nëse ky bashkim do të ishte në koncept.
Ky bashkim është mekanik dhe nuk e kam shpresën se ky bashkim e ka kuptimin e vet, nëse nuk shtrohen disa parametra sqarues për votuesit, për opinionin publik.
E para ky bashkim mekanik nuk është i dhunshëm, por i domosdoshëm për faktin se jemi në vitin zgjedhor dhe instrumentet ndërkombëtare, po luftojnë që të krijojnë një opozitë e cila realisht e bën luftën e saj, duke mos u marrë me vetin, por me pushtetin.
Ky koncept bëri hapin e parë edhe pse shumë i vonuar. Një betejë 2 vite e gjysëm për asgjë dhe për të arritur një bashkim mekanik.
Në politikë lejohen kundërshtitë, përplasjet për të arritur më e mira, rivalitetet për të fituar ai që dërgon çështjen më përpara.
Asnjë prej këtyre të trejave nuk është se ende nuk e dimë se çfarë do të bëhet me liderin, kush do të jetë njeriu që do të udhëheqë opozitën, apo kush do të jetë beteja e shumë segmenteve për të krijuar një unitet në kupolë, dhe më e rëndësishmja a e kanë të vërtetë qëllimin për ti hyrë një gare për pushtet apo për të mirëmbajtur veten.
Për të gjitha këto unë jam ende i paqartë’.
