Nga Boldnews.al
Një nga firmat që ka shënuar rritje galoponte këto kohë është “Soft Solution”, e z.Ermal Beqiri. Dikur, z.Beqiri ishte një ekspert privat, madje dëshmoi edhe në Gjykatën e Lartë për video-përgjimin “Meta-Prifti”. U akuzua nga opozita e atëhershme, mazhoranca e sotme, se ishte i njëanshëm.
Por, koha ka kaluar dhe fjala popullore “mikun mbaje afër, por më shumë mbaj afër armikun”, vlen për eksponentë të mazhorancës në marrëdhënie me z.Beqiri. Tashmë eksperti është bërë biznesmen i fuqishëm, aq sa ka fituar me dhjetëra procedura nga institucionet shtetërore. Firma e tij “Soft & Solution” është kthyer në një “peshkaqen” të fondeve publike, aq sa ai ka fituar tendera edhe në zyrën e vetë kryeministrit Edi Rama.
Mësohet se firma e z.Ermal Beqiri është shpallur fituese e një tenderi nga AKSHI, megjithëse ofroi 500 mijë euro më shumë sesa oferta më e ulët. Sipas dokumenteve që disponon redaksia e BoldNews.al, bëhet fjalë për kontratën me objekt “përmirësimi dhe ristrukturimi i platformës së bashkëqeverisjes”, për Agjencinë për Dialog dhe Bashkëqeverisje.
Kohëzgjatja është 12 muaj implementim dhe 24 muaj mirëmbajtje nga nënshkrimi i kontratës. Firma e z.Beqiri “SOFT & SOLUTION” dha një ofertë prej 194.525.000 lekë pa TVSH. Ofertën më të ulët e pati firma “G.A.C” me vlerë 154.874.999 lekë pa TVSH. Ose plot 500 mijë euro më pak sesa oferta e firmës fituese.
Sipas dokumenteve, kjo oferta është s’kualifikuar për shkak se “nuk ka ngarkuar sigurimin e ofertës, s’ka dëshmi të shërbimeve të mëparshme të ngjashme, nuk ka deklaruar një numër prej mesatarisht 6 punonjës të siguruar”.
Veliaj i jep tender ekspertit që “rrëzoi” video përgjimin “Meta-Prifti”!
Ndërkohë, personi i parë i cili e “rekrutoi” z.Ermal Beqiri ka qenë Erion Veliaj. Në vitin 2023, BoldNews.al raportoi sesi Bashkia e Tiranës i ka dhënë një tender kompanisë së z.Ermal Beqiri, megjithëse ishte një emër që lidhej ngushtë me video përgjimin “Meta – Prifti”, pasi ka qenë ekspert në Gjykatën e Lartë.
Ai ishte një nga ekspertët që “rrëzoi” autenticitetin e këtij video-përgjimi. Por, pas 2013-ës Beqiri ka mbajtur edhe poste publike si në Hipotekë apo edhe në Ministrinë e Drejtësisë. Tenderi i Bashkisë së Tiranës ishte “përmirësime, riorganizime, integrime e zhvillime te reja të platformës zyrtare në institucion”, ku firma “SOFT & SOLUTION” u shpall fituese megjithëse kishte një ofertë me një vlerë dukshëm më të lartë sesa më e ulëta.
Sipas ekstraktit të QKB-së, firma “SOFT & SOLUTION” është themeluar në datën 28 janar 2011, disa ditë pas vrasjeve në bulevard. Në atë kohë, mazhoranca e sotme protestoi pas videos “Meta-Prifti”, ndërsa procesi vijoi në Gjykatën e Lartë. Një ndër ekspertët është edhe Ermal Beqiri, pronar me 100 % të aksioneve të “SOFT & SOLUTION”, i cili do të dilte në konkluzionin se “në orën e dorëzuar nuk kanë gjetur asnjë gjurmë të video-përgjimit origjinal, mundësia për ndërhyrje në videon e bisedës është e madhe…”.
