Një 45-vjeçar është arrestuar pas mbërritjes me traget në Portin e Durrësit. Bledar Xhufi, 45 vjeç, rezultonte në kërkim pasi ndaj tij rëndonte një dënim me burg dhënë nga gjykata e Krimeve të Rënda.
45-vjeçari ishte shpallur në kërkim pasi Gjykata e Shkallës së Parë për Krimet e Rënda e ka dënuar me 8 vjet burgim, për veprën penale “Trafikimi i lëndëve narkotike”, kryer në bashkëpunim.
Arrestimi i tij erdhi “si rezultat i shkëmbimit të informacioneve ndërmjet Policisë Kufitare të portit të Durrësit dhe Seksionit për Hetimin e Narkotikëve të DVP Vlorë”, njoftoi policia.
Sipas hetimeve, Xhufi, në bashkëpunim me persona të tjerë, është përfshirë në trafikun e lëndëve narkotike nga Shqipëria në Itali në vitet 2005-2006.
Grupi është cilësuar përgjegjës për transportimin me mjete lundruese nga Shqipëria në Itali të disa ngarkesave me lëndë narkotike, prej të cilave edhe trafikimin e një sasie prej 351 kg drogë, e bllokuar në janar të 2006, në një qytet të Italisë.
