Kreu i grupit parlamentar të PD-së, Gazment Bardhi akuzoi këtë të martë se Gjykata Kushtetuese është nën urdhrat e kryeministrit Edi Rama. Në një deklaratë për mediat nga kryesia e Kuvendit, ai tha se para vendimit për marrëveshjen Rama-Meloni, anëtarët e Kushtetueses i thirri në mbledhje Vali Bizhga, drejtoresha e kabinetit të kreut të qeverisë.
Ai gjithashtu dënoi moszbatimin e vendimit të Gjykatës Kushtetuese nga Kuvendi, për mandatin e deputetes socialiste Olta Xhaçka. Paralajmëroi ankim në GJK të ligjit të miratuar nga mazhoranca në Kuvend për komisionet hetimore. Ligji kufizon të drejtën e opozitës për ngritjen e tyre dhe vendosin rregulla që i japin mundësi mazhorancës të kontrollojë vendimmarrjen për mbledhjen e provave dhe thirrjen e dëshmitarëve.
Lidhur me tensionet në seancën e djeshme të Kuvendit, Bardhi paralajmëroi padi penale ndaj kryeparlamentares Lindita Nikolla. Ai tha se është përgjegjësia e saj që deputetët demokratë u penguan të futen në seancën plenare nga punonjësit e gardës.
Në lidhje me bashkimin e PD, Bardhi tha ata janë bashkuar rreth ideve dhe jo rreth individëve. “Ne bashkohemi rreth ideve, që është beteja kundër Edi Ramës dhe nuk bashkohem rreth individëve. Keqpodorimi që Rama i ka bërë konfliktit të brendshëm në PD dhe opozitë, nuk ka sjellë pasoja vetëm për partinë, por edhe për Shqipërinë”, deklaroi.
