Dhjetëra qytetarë shqiptarë që jetojnë në Itali, janë mbledhur në Romë pasditen e kësaj të diele, për të kundërshtuar arrestimin e ish-kryeministrit Sali Berisha.
Me pankarta në duar ata kanë kërkuar lirimin e liderit opozitar.Protestuesit u shprehën se do të jenë pjesë edhe e protestave kombëtare që do të mbahen në Tiranë dhe me votën e emigrantëve do të rrëzojnë nga pushteti regjimin.
“Largimi i Ramës duhet të jetë emergjente. Besoj se me votën e emigrantëve do të jetë sa më i shpejtë rrëzimi i kësaj qeverie të korruptuar.”
Një nga të rejat që i ishte bashkuar protestës u shpreh se arsyeja e emigrimit është qeveria e korruptuar që është në pushtet dhe ka shkatërruar të gjithë vendin.
“Të gjithë jemi të vetëdijshëm se çfarë ndodh në Shqipëri dhe të gjitha kronikat në televizione janë kronikat e zeza, kjo nuk është Shqipëria që duam. A i regjim që është tani në pushtet më ka detyruar të largohem ashtu si dhe ju, duhet të ngremë zërin për vendin tonë, për shqiptarët dhe gjërat të vihen në vendin e duhur”- u shpreh një protestuese.
Nërkohë një tjetër protestë është thirrur më datë 13 janar, në Itali për të njëjtin motiv.
Kujtojmë që ish-kryeministri, Sali Berisha prej datës 30 dhjetor 2023 ndodhet në “arrest shtëpie”. Gjykata e Posaçme pranoi kërkesën e SPAK për ashpërsimin e masës së sigurisë dhe ndalimit të komunikimit për ish-kryeministrin Sali Berisha. Avokati i Berishës e cilësoi ndalimin e komunikimit si privim të lirisë për një deputet.
