Ministri i Brendshëm Taulant Balla teksa ka folur rreth fatit të Ervis Martinajt, i cili rezulton i zhdukur që prej gushtit të vitit 2022, konfirmoi se polumbarët e forcave speciale RENEA kanë kryer kontrolle për rreth dy muaj për të gjetur trupin e tij në një zonë detare në jug të Shqipërisë.
I ftuar në emisionin “Top Story”, Balla shtoi se nga kërkimet nuk ka patur rezultat duke shtuar se “ndoshta kërkimet vazhdojnë diku tjetër”. Sipas tij, Policia e Shtetit e ka një pistë rreth zhdukjes së Ervis Martinajt, pas disa dëshmive të disa personave që kanë njohuri.
Pjesë nga biseda:
Pyetje: Çështja e Ervis Martinajt, nuk dihet a është gjallë apo ka vdekur, apo ka bërë operacion plastik siç thonë sepse ka shumë lekë?
Gazetari: Polumbarë të Renea kanë kërkuar në një zonë në det, pasi mendohej se trupi mund të ishte hedhur në det. Nuk është gjetur gjë, edhe pse polumbarët kanë qëndruar 6 ditë në këtë zonë.
Ministri Balla: Kërkimet aty kanë vazhduar 2 muaj, jo 6 ditë, por ndoshta kërkimet vazhdojnë diku tjetër. Policia e shtetit ka një pistë (për Ervis Martinaj), ka disa deklarime të disa personave që kanë njohuri dhe informacion që duhet të ndërlidhjen.
