Ndërsa qytetarët në Shqipëri vijojnë protestat, Taulant Balla dhe zyrtarë të tjerë të mazhorancës shfaqen në një tjetër realitet në Strasburg, duke luajtur letra dhe duke shijuar momente relaksi.
Sipas videos së publikuar nga Syri TV, duket Balla, Arbjan Mazniku, Pirro Vengu dhe zyrtarë të tjerë të ulur në një tavolinë duke luajtur “murlan”. Në video, Balla shihet me puro në dorë, ndërsa letrat i lë hapur mbi tavolinë.
Por momenti i qetësisë për zyrtarët socialistë është ndërprerë nga qytetarë që i kanë përballur drejtpërdrejt, duke i pyetur se çfarë po bëjnë për Shqipërinë dhe pse po kalojnë kohën duke luajtur letra, ndërsa në vend qytetarët protestojnë.
“Çfarë po bëni për Shqipërinë? Po lozni me letra, po kënaqeni?”, dëgjohen t’u thonë qytetarët. Më tej, ata i akuzojnë se po shijojnë resorte dhe luks me taksat e shqiptarëve: “Ju me taksat tona! Për të ndenjur në resorte, për të luajtur me letra!”.
Episodi është përmendur edhe nga kreu i grupit parlamentar të PD-së, Gazment Bardhi, i cili ironizoi Ballën gjatë fjalës së tij në Parlamentin Europian: “Taulantit do i shkonte puro shumë më tepër po mos ta fshihte… por duket se instinkti i vjen natyrshëm”.
