Deputeti i Partisë Demokratike, Asllan Dogjani ka folur në lidhje me përjashtimin e 19 deputetëve të opozitës nga parlamenti, në SYRI TV.
Dogjani u shpreh se, edhe nëse 1 deputet i opozitës të jetë në sallë nuk do të ketë seancë normale në parlament.
“Edhe nëse një deputet i opozitës të jetë në sallën e parlamentit, nuk do të ketë seancë normale. U bëj thirrje kolegëve të mi deputetë, që përjashtimet të mos i frikësojnë, dhe as të mos hetizojnë. Unë kam dy muaj që përjashtohem rresht, dhe herën e fundit pa asnjë lloj shkaku. Këto përjashtime janë në mënyrë arbitrare, arrogante ndaj kësaj qeverie duke u munduar që ti fusin frikën opozitës dhe ti japin një mesazh qytetarëve, që ne kur përjashtojmë deputetët e opozitës, imagjinoni se çfarë ju bëjmë ju.
Duke na përjashtuar ai largon vëmendjen e opinionit publik dhe ndërkombëtar nga ngritja e komisioneve hetimore, nga reforma zgjedhore, pasi ndërkombëtarët kanë kërkuar një reformë gjithëpërfshirëse. Ne si deputetë të opozitës duhet të reagojmë në fort nëse këta na përjashtojnë. ‘Herën tjetër do më përjashtoni plot, sepse po na përjashtoni kot’, u thashë para pak ditësh në komisionin e etikës. Nëpërmjet këtyre përjashtimeve, Rama tregon që kontrollon gjithçka dhe e ka kthyer parlamentin në një kukull në duart e tij”, tha deputeti.
