Banorët e shtëpive të prishura nga tërmeti po protestojnë ditën e sotme para bashkisë së Tiranës.
Ata shprehen se prej dy muajsh nuk kanë marrë bonusin e qerasë dhe se prej katër vitesh nga fatkeqësia e tërmetit nuk kanë marrë akoma një banesë.
Qytetarët kanë kërkuar një takim me kryebashkiakun e Tiranës, Erion Veliajn. Gjithashtu tregojnë se janë larguar nga shtëpitë e tyre sepse nuk donin të rrezikonin fëmijët dhe se qeveria ju ka premtuar banesa të reja te lagjja “5 maji”.
Ndërtesat e tyre janë dëmtuar që nga tërmeti i vitit 2019 dhe aso kohe ata kanë marrë një bonus qeraje por që i është ndërprerë dhe në momentin që kanë shkuar për të bërë riaplikimin për të rifituar bonusin e qerasë nuk i është pranuar nga bashkia, me pretendimin se nuk janë pronarë të atyre banesave ku po jetojnë aktualisht.
Banori: “Jemi 50 familje dhe 30 që banojnë aty. Fatkeqësi ra tërmeti si për ata si për ne. Na thanë që do na japin shtëpi dhe na dhanë bonus qeraje prej 4 vitesh. Me ketë bonus qeraje do strehoheni deri sa të merrni shtëpinë. Tani mbaroi bonusi 4 vjeçar dhe shtëpitë nuk na i dhanë, na i ndërprenë. Kemi aplikuar te Njësia Nr. 4 , do ju japim shtëpi na thanë për 4 vjet, do ndahen shtëpitë komplet, kush merr bonusin e qerasë do trajtohet me bonus qeraje dhe shtëpi. Bonusin e qerasë na e kanë prerë në dhjetor. U bënë 2 muaj. Sot ne protestojmë se duam shtëpi si gjithë të tjerët. Nuk dua të jetojë rrugëve, nuk dua të marr rrugët e botës sepse jam shqiptar dhe dua të jetoj në vendin tim.”
Banori tjetër: “Drejtuesi i njësisë administrative erdhi fillimisht kur ishin votat, erdhi bashkë me Arben Ahmetajn dhe ka thënë shtëpitë janë tuajat, në daçi shiteni jepini me qera shtëpitë janë tuajat. Atëherë për mashtrime. Na morën votat. Ra tërmeti dhe ne nuk donim të dilnim jashtë dhe këta na u vunë dilni dilni se është e pabanueshme. Ata erdhën se ishte fushatë dhe u duheshin votat do të japim shtëpitë dilni përjashtë e këtë dhe atë. Ne dolëm jashtë dhe morëm bonusin prej 4 vitesh. Tani nga dhjetori nuk na e japin bonusin. Ku është problemi?!”
