Nga Boldnews.al
Transporti qytetas dhe ndërqytetas në Tiranë i ngjason linjave të famshme në Indi. Mjete të amortizuara. Askush nuk respekton oraret. Tejmbushje dhe një lëvizje tepër e ngadaltë. Për të mos përmendur trafikun, i cili e ka vështirësuar së tepërmi këtë shërbim.
Nëse do të bësh një vëzhgim në internet me premtimet e krerëve të Bashkisë së Tiranës do të gjesh me dhjetëra. Nga tramvaji, metroja apo edhe ata elektrikët. Gjithçka është thënë. Asnjë gjë s’është bërë! Madje, as ato tabelat e vendosura në stacione që të tregojnë oraret. Askush s’e di kur do vijë dhe ikë autobusi i radhës. As kur fillon e mbaron. Gjithçka një kaos, teksa gjatë kësaj kohe janë hedhur miliona e miliona euro.
Ish-kryetari i Bashkisë së Tiranës, Lulzim Basha, premtoi metro. Veliaj tramvaj apo anasjelltas. Madje, në internet do të gjesh me qindra kronika televizive, nga ato të gatshmet. Një kronikë fillon me titullin “pasagjeri mëson në kohë reale itinerarin, shkurton kohën e udhëtimit’”. Tjetra me emërtimin “62% e kilometrave me korsi të dedikuar”. Këto janë të viteve të fundit. Por, do të gjesh edhe tituj bombastikë. “Veliaj: Korsi të dedikuara për 3 linjat e shpejta të …”. Madje edhe “Tiranës i shtohet autobusët elektrikë”.
Por, çfarë është bërë në terren? Gjithkush e di se s’ka as metro. Tramvaj jo e jo. As autobusë elektrikë. Praktikisht asgjë! Vetëm disa autobusë, ku më të rinjtë do të jenë të prodhuar para 10 viteve. Të tjerët para 20 apo 30 viteve, ata të dalë jashtë qarkullimit në vendet perëndimore. Janë vendosur disa autobusë elektrikë, por ata janë shkatërruar dhe kanë rrezikuar jetën e pasagjerëve dhe përdoruesve të tjerë të rrugës. Një aferë klienteliste e madhe, teksa gjithçka është në pikën 0. Janë bërë premtime e premtime, teksa Veliaj është futur në mandatin e tretë dhe të fundit dhe s’ka asnjë gjë në vijë për këto premtime.
Ka marrë vota me premtime boshe, do e shtyjë edhe këtë mandat për të parë se ku do të degdiset nga vetë Rama. Dhe, në këtë mandat të fundit, ai bën edhe tendera në ajër, pikërisht për transportin e udhëtarëve.
Sipas dokumenteve që disponon redaksia e BoldNews.al, Bashkia e Tiranës ka hapur procedurën e prokurimit “projekti i monitorimit, menaxhimit dhe kontrollit të transportit publik qytetës, nëpërmjet sistemeve inteligjente të transportit (AVL), në nivel qendror dhe lokal, si dhe sistemeve të informacioneve në kohë reale për pasagjerët (RTIP), për disa nga stacionet”. Vlera e këtij tenderi është plot 350.000.000 lekë, ose me TVSH shuma shkon në plot 4 milionë euro. Një shumë e konsiderueshme, pasi bëhet fjalë për pajisje elektronike dhe shërbime të teknologjisë së informacionit. Nëse do të shohësh procedurën bën fjalë për ato oraret e famshme që duhet të jenë në stacione. Gjithkush duhet të dijë se kur vjen autobusi i radhës, përderisa paguan takse infrastrukture dhe biletën e autobusit. Pra, pagesë dy herë. Gjithsesi, duket se tenderi është në ajër, pasi të tilla procedura të kota bëhen gjithmonë dhe pasagjerët s’marrin asnjëherë shërbim.
