Luan Rama u shkëput nga politika, pas zgjedhjeve elektorale të vitit 2021, pasi nuk arriti të merrte dot mandatin e deputetit, ku garonte si drejtues politik i LSI-së në Qarkun e Vlorës.
Gjatë fushatës elektorale u përfol për përplasje të forta mes tij dhe eksponentëve kryesor të LSI-së, Monika Kryemadhi, Petrit Vasili dhe Ilir Metën, e duket se këto zëra i ka konfirmuar së fundmi vetë Luan Rama.
Gjatë një interviste televizive për emisionin “Glamour Zone”, i pyetur se me cilin nga politikanët e sotëm nuk flet më, ai nuk nguroi të përmendte emrin e Ilir Metës, por pa treguar arsyet.
Ester Bylyku: Me cilin nga politikanët sot nuk flet më?
Luan Rama: Me Ilir Metën. Por preferoj të mos e zbuloj arsyen. Është një sekret mes nesh që kam zgjedhur ta mbaj për vete.
Kujtojmë se Vlora ishte një prej qarqeve me përplasjen më të ashpër gjatë fushatës zgjedhore të 25 prillit të vitit 2021 mes Partisë Socialiste dhe Lëvizja Socialiste për Integrim. Aq e fortë ishte kjo përplasje, sa qarku tërhoqi edhe vëmendjen e Presidentit në atë kohë, Ilir Meta, që e vizitoi shpesh gjatë fushatës.
Fushata e LSI-së drejtohej në Vlorë nga Luan Rama. Kjo parti i kishte vënë vetes si objektiv dy mandate në Qarkun e Vlorës. Por, pas numërimit të fletëve të votimit nuk ja doli mbanë as të siguronte një mandat.
Gjatë fushatës elektorale, Luan Rama, që ishte i pari në listën e kandidatëve, pati përplasje me Petrit Vasilin dhe Monika Kryemadhin, aq sa u mënjanua.
Pati raportime se në fushatë Monika Kryemadhi dhe Petrit Vasili kishin udhëzuar strukturat e LSI-së në Vlorë, që të mos i jepnin asnjë votë Luan Ramës, por votat të shkonin për Griselda Myslimin, e renditur e dyta në listë. Zërat u përforcua në një takim elektoral të zhvilluar në Vlorë nga Petrit Vasili e Monika Kyemadhi. Pas takimit, Vasili bëri thirrje publikisht për të votuar Griselda Myslimin.
Burime për mediat në atë kohë, bënin me dije se Meta dhe Kryemadhi dyshonin te Luan Rama për një afrim me kryeministrin Ramën dhe PS, por ky i fundit i ka konsideruar si thashetheme dhe se nuk ka qenë kurrë tradhtar.
