Apeli i GJKKO ka shtyrë vendimin mbi ankimimin e liderit të opozitës Sali Berisha mbi masën “Arrest shtëpie”.
Kështu, lidhur me kërkesën për lehtësimin e masës së sigurisë, Gjykata ka vendosur të shprehet ditën e enjte në orën 09:00.
Avokatët kërkojnë rrëzimin e vendimit të Shkallës së Parë të 30 dhjetorit që zëvendësoi masën e sigurisë nga detyrim paraqitje në arrest shtëpie.
Avokati i Berishës, Genc Gjokutaj e cilësoi shtyrjen e vendimit nga Apeli, si një shkelje e rëndë, ndërsa u shpreh se nuk ka barazi palësh në gjykim.
“Prokurorët sot mbajtën një qëndrim, i qëndruan kërkesës së tyre variabël. Presim vendimin. Vendimi për të mos administruar përjashtimin e gjyqtares, është një shkelje e madhe.
Do presim nesër në 9 të shpallet vendimi.
Mungesa e gjykatës i bën prokurorët të vijnë në gjyq si në bar kafe, nuk i kanë problem argumentet që bëjnë. Nuk ka barazi palësh në këtë gjykim. Presim ditën e nesërme, nuk mund të hipotezoj sot për vendimin e nesërm.
Rrëzohet përfundimisht alibia e SPAK që Berisha i shmanget SPAK dhe u vërtetua se procesi po ecën normalisht dhe nuk e kuptoj çfarë sensi ka masa kur jemi në një realitet të ri.”- tha Gjokutaj.
Kujtojmë se ditën e djeshme, për rreth 2 orë, ish-kryeministri dëshmoi para prokurorëve Arben Krajës dhe Enkelejda Millonait. Pas daljes nga SPAK, Berisha pohoi për mediat se ishte ai që i kishte marrë në pyetje prokurorët, ndërsa sulmoi ashpër qeverinë Rama dhe SPAK-un, si institucion i varur.
Berisha është nën arrest shtëpie që prej 30 Dhjetorit pasi akuzohet për korrupsion pasiv në procedimin penal për privatizimin e ish-kompleksit sportiv “Partizani”.
Vetë kryedemokrati i ka quajtur akuzat ndaj tij të motivuara politikisht nga kundërshtari i tij politik, kryeministri Edi Rama. Ndërsa procedurën e ndjekur ndaj tij deri në ashpërsimin e masës së sigurisë e ka cilësuar antikushtetuese.
