Prokuroria e Posaçme ka refuzuar kërkesën e ish-kryeministrit Sali Berisha, i cili kërkoi të marrë pjesë në seancat plenare në Kuvend.
Sipas SPAK, ligji nuk e parashikon miratimin e një kërkese të tillë.
“… E drejta për të ushtruar profesionin, apo qoftë edhe mandatin e fituar nga zgjedhjet për në Kuvend, duhet të konsiderohet si e papajtueshme me zbatimin e masës së sigurimit ‘arrest në shtëpi’ parashikuar nga neni 237 i K.Pr.Penale, ashtu siç është e papajtueshme edhe për çdo qytetar tjetër që i nënshtrohet kësaj mase, e drejta për të shkuar në punë”, thuhet në vendimin e prokurorëve Arben Kraja dhe Enkelejda Millonai.
Berisha është nën arrest shtëpie që prej 30 Dhjetorit pasi GJKKO pranoi kërkesën e SPAK për të ashpëruar masën e sigurisë detyrim paraqitje ndaj tij.
Berisha akuzohet për korrupsion pasiv në procedimin penal për privatizimin e ish-kompleksit sportiv “Partizani”.
Vetë kryedemokrati i ka quajtur akuzat ndaj tij të motivuara politikisht nga kundërshtari i tij politik, kryeministri Edi Rama. Ndërsa procedurën e ndjekur ndaj tij deri në ashpërsimin e masës së sigurisë e ka cilësuar antikushtetuese.
Masa e arrestit në shtëpi është ankimuar nga kryedemokrati dhe është caktuar të shqyrtohet në Apel më 24 Janar.
Një ditë më pas, më 25 Janar, SPAK ka vendosur të marrë në pyetje edhe Jamarbër Malltezin për herë të parë gjatë hetimit.
Ndërkohë deputetët dhe simpatizantët demokratë i kanë shkuar Sali Berishës pothuajse çdo ditë në mbështetje poshtë pallatit ku banon, teksa pritet që të mblidhen edhe ditën e sotme rreth orës 17:00.
