Dhjetra shqiptarë janë ngritur në protestë para parlamentin italian në Romë, në një kohë që në këtë institucion po diskutohet në lidhje me marrëveshjen Rama-Meloni për refugjatët.
Mediat në shtetin fqinj kanë raportuar se disa qytetarë shqiptarë kanë organizuar një demonstratë pranë pallatit Montecitorio në Romë, për të protestuar kundër arrestimit të ish-kryeministrit Sali Berisha, aktualisht në arrest shtëpie me akuzën e korrupsionit.
Me parullat “Berisha libero” ata kanë kërkuar lirimin e ish-kryeministrit nga arresti në shtëpi, ku ndodhet prej ditësh tashmë.
Në fotot e publikuara nga Sekretari për Diasporën pranë PD, Indrit Hoxha, me pankarta në duar ku kërkohet lirimi i kryedemokratit Sali Berisha, shqiptarët janë ngritur edhe kundër regjimit të kryeministrit Edi Rama.
“Në Romë para parlamentit protestohet kundër rregjimit të Edi Ramës dhe arrestimit të liderit të opozitës shqiptare“, shkruan Hoxha në Facebook.
Kujtojmë që Sali Berisha prej datës 30 dhjetor 2023 ndodhet në “arrest shtëpie”. Gjykata e Posaçme pranoi kërkesën e SPAK për ashpërsimin e masës së sigurisë dhe ndalimit të komunikimit për ish-kryeministrin Sali Berisha. Avokati i Berishës e cilësoi ndalimin e komunikimit si privim të lirisë për një deputet.
Ai është në hetim për veprën penale të korrupsionit së bashku me dhëndrin e tij, Jamarbër Malltezi, i cili akuzohet nga SPAK se ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt falë vendimeve të qeverisë të marra nga vjehrri i tij.
Berisha ashtu edhe Malltezi i kanë kundërshtuar akuzat dhe e kanë cilësuar hetimin si të orkestruar nga kryeministri Edi Rama.
