Ish-Presidenti i Komisionit Europian, Jacques Delors, i konsideruar si arkitekti i BE-së moderne, ka ndërruar jetë në moshën 98-vjeçare. BBC shkruan se lajmin e ka konfirmuar vajza e tij.
Delors ndihmoi në krijimin e tregut të përbashkët duke lejuar lëvizjen e lirë të njerëzve, mallrave dhe shërbimeve në union. Ai shërbeu nga viti 1985 deri në vitin 1995 ku hodhi ndër të tjera edhe bazat për monedhën e përbashkët europiane, Euron.
Vajza e tij, Martine Aubry, tha se Delors ndërroi jetë në gjumë të mërkurën në mëngjes në shtëpinë e tij në Paris. Presidenti i Francës, Emmanuel Macron vlerësoi figurën e lartë të Delors, i cili ndër të tjera ka shërbyer edhe si ministër Financash atje.
“Angazhimi, idealet dhe ndershmëria e tij do të na frymëzojë gjithmonë. Nderoj punën dhe kujtimin e tij dhe ndaj dhimbjen me të dashurit e tij”, tha Macron.
Delors shërbeu në tre mandate si President i Komisionit Europian, më gjatë se çdokush tjetër. Si një socialist francez, ai besonte fort në integrimin e pasluftës. Përveç tregut të përbashkët dhe Euros, gjatë mandatit të tij u krijua marrëveshja e Shengenit për udhëtimet dhe programi Erasmus për shkëmbimin e studentëve.
