Nga Boldnews.al
Aksioni opozitar po kulmon këto ditë, teksa deputetët janë përplasur me punonjës të Gardës së Republikës në tentativë për t’u futur në ambiente e Kuvendit. Flakadanë, tymuese edhe prishje të karrigeve dhe tavolinave ka qenë lëvizja e opozitës, pas miratimit të Kuvendit të kërkesës së SPAK-ut për heqjen e imunitetit të deputetit dhe kreut të opozitës Sali Berisha. Për pasojë, opozita ka planifikuar që krahas këtyre veprimeve, të ftojë të gjithë qytetarët të bëjnë një demonstratë në ditët në vijim. Ky mobilizim ka sjellë edhe lëvizjen e institucioneve shtetërore për të hetuar dhe parandaluar këto veprime. Policia, SHIU dhe Garda e Republikës kanë bërë tendera me shpejtësi “pa garë” për mirëmbajtjen e pajisjeve përgjuese dhe blerjen e fishekëve. Duket se Ballën dhe Peleshin e ka zënë frika e aksionit opozitar, ndërsa do të ndërmarrin veprime për të përgjuar eksponentë të opozitës. Madje, me shpejtësi është bërë një tender për mirëmbajtjen e pajisjes përgjuese “Imsi Catcher”, që u përdor nga policia disa kohë më parë për të përgjuar opozitën. A do të përdoret i njëjti skenar?!
Dokumentet e mësipërme janë të Drejtorisë së Përgjithshme të Policisë së Shtetit. Procedura e parë është me negocim me shpallje paraprake te njoftimit, ndërsa bëhet fjalë për “shërbim support teknik të pajisjes MSCAN” me afat nga lidhja e kontrates deri me 29.12.2023. Pra, për vetëm disa ditë! Procedurën e fitoi kompania “OpenTech Consulting&Services” me një vlerë 1.750.000 lekë pa TVSH.
Ndërkohë, e njëjta drejtori ka bërë edhe një tjetër procedurë, me objekt “me negocim me shpallje paraprake të njoftimit”. Bëhet fjalë “shërbim support teknik të Q.D.M.O speciale” deri më 29 dhjetor 2023. Firma fituese është “T B S 96” me një çmim total të ofertës prej 1.568.000 lekë pa TVSH.
E njëjta firmë “T B S 96” është kontraktuar për të mirëmbajtur deri më datë 29 dhjetor 2023 edhe pajisjen “Imsi Carther”, me një çmim të ofertës 4.850.000 lekë. Të dyja janë pajisje vëzhguese dhe përgjuese, ndërsa kërkohen të mirëmbahen deri në fund të vitit nga ndonjë frikë e mazhorancës për lëvizjen opozitare.
Ndërkohë, në të njëjtën kohë me Policinë e Shtetit, Ministria e Mbrojtjes ka bërë me shpejtësi procedurën e kufizuar “prokurim në fushën e mbrojtjes dhe të sigurisë”. Objekti i kontratës është “blerje pajisje dhe softe për përmirësimin cilësor të produkteve të inteligjencës (O1001)”, me fond limit 26.342.000 lekë pa TVSH. “Kohëzgjatja e kontratës është Duke filluar nga lidhja e kontratës me përfundim brenda 45 (dyzetë e pesë) ditëve”. Pra, edhe kjo kontratë për disa ditë vetëm e vetëm për opozitën?! Sërish, paratë i janë dhënë firmës “T B S 96”, e njëjta që fitoi edhe procedurat e Policisë së Shtetit.
Më lart faktuam se Policia dhe Ushtria do të mirëmbanin këto kohë pajisjet e inteligjencës, ato të vëzhgimit dhe përgjimit. Ndërkohë, një tjetër procedurë është bërë me shpejtësi dhe bën fjalë “blerje fishekë 9×19 mm Parabel”, me afat 12 muaj nga data e nënshkrimit të marrëveshjes kuadër. Fondi limit i kësaj procedure është 39.200.000 lekë, teksa ofertë kishte vetëm nga kompania “RO. GAT SECURITY” që ofroi 38.220.000 lekë.
