Gjykata e Posaçme ka caktuar 26 Dhjetorin për të shqyrtuar kërkesën e SPAK për ashpërsimin e masës së sigurisë në arrest shtëpie ndaj kryedemokratit Sali Berisha.
Arrest në shtëpi është masa që kërkoi Prokuroria e Posaçme në gjykatë për kreun e PD-së, Sali Berisha. Tanimë i takon, GJKKO-së të shprehet nëse do e pranojë ose jo kërkesën e SPAK, që e akuzon Berishën për korrupsion pasiv në procedimin penal për privatizimin e ish-kompleksit sportiv “Partizani”.
Gjykata vendosi që seanca të zhvillohet të martën e 26 Dhjetorit, në ora 10:00. Në rast miratimi, për vendimin njoftohet Policia, që është organi të cilit i ngarkohet zbatimi i verdiktit të gjykatës.
Socialistët miratuan të hënën në Këshillin e Mandateve dhe më pas të enjten në Kuvend kërkesën e SPAK për ashpërsimin e masës së sigurisë ndaj Berishës. Seanca plenare u shënua me tensione brenda sallës së Kuvendit, ndërsa jashtë u zhvillua një protestë e thirrur nga opozita. Me mbylljen e seancës plenare, kryeparlamentarja Lindita Nikolla njoftoi prokurorinë për vendimin e marrë dhe më tej SPAK depozitoi në GJKKO kërkesën për masën e re ndaj kryedemokratit.
Vendimi u quajt antikushtetues nga kryedemokrati Sali Berisha, i cili i qëndron arsyetimit se SPAK shkeli Kushtetutën me interpretimin e pikës 2 të nenit 73 që në procedurën e dhënies së masës së detyrim paraqitjes, ndaj tij. Masë që nuk e zbatoi. “Nuk mund të zbatoja një vendim antikushtetues”, është shprehur kryedemokrati. Por për këtë shkak, SPAK që mendon ndryshe nga Berisha, iu drejtua më pas Kuvendit për të caktuar një masë më të ashpër ndaj kreut të PD-së. Ndërkohë, për zgjidhjen e ngërçit një grup deputetësh iu drejtuan Gjykatës Kushtetues. Dhe kur pritej një interpretim nga Kushtetueseja për ti dhënë vënë ‘kapak’ debatit, gjykata vendosi të mos merrte në shqyrtim kërkesën e deputetëve të opozitës, me arsyetimin se ata nuk janë palë në konflikt. Vendimi i gjykatës u cilësua nga Berisha “colpo di gracia” për rendin kushtetues.
Ndërsa akuzat ndaj tij në procedimin penal për privatizimin e ish-kompleksin sportiv “Partizani”, i quan politike dhe të urdhëruara nga kryeministri Edi Rama.
Në një konferencë për mediat këtë të premte, i pyetur nëse do e njohë vendimin e GJKKO-së në rast të aprovimit të masës së arrestit, kryedemokrati Berisha tha vetëm se e gjitha procedura e ndjekur ndaj tij nga SPAK është antiligjore. “Në këtë moçal paligjshmërie unë kam bërë çdo përpjekje që mund të bëjë një politikan që e do ligjin dhe kushtetutën për ti mbrojtur ato”, u shpreh.
Pyetjes se cili do jetë ambienti ku do i nënshtrohet masës së sigurisë nëse kërkesa e SPAK aprovohet nga GJKKO, Berisha tha se për këtë po konsultohet ende me avoketërit.
I pyetur se si do ndikojë masa shtrënguese e sigurisë në të ardhmen e opozitës, kryedemokrati theksoi se “fati i opozitës do jetë fitorja”. “Dy gjëra tregon historia, se me burgje dhe atentate opozita nuk mposhtet kurrë”, u shpreh ai.
