Rreth dy orë pas përfundimit të seancës plenare, kryeparlamentarja Lindita Nikolla i ka dërguar SPAK-ut njoftimin e miratimit të kërkesës nga Kuvendi, për arrestimin e Sali Berishës.
Më herët gjatë ditës, socialistët miratuan në Kuvend kërkesën e SPAK për ashpërsimin e masës së sigurisë ndaj Berishës nga detyrim paraqitje në arrest me burg apo arrest shtëpie. Seanca u shënua me tensione brenda sallës së Kuvendit, ndërsa jashtë u zhvillua një protestë e thirrur nga opozita.
Vendimi u quajt antikushtetues nga kryedemokrati Sali Berisha, i cili i qëndron arsyetimit se SPAK shkeli Kushtetutën me interpretimin e pikës 2 të nenit 73 të Kushtetutës që në procedurën e dhënies së masës së parë ndaj tij. SPAK nga ana tjetër mendon ndryshe, ndërkohë që për zgjidhjen e ngërçit një grup deputetësh iu drejtuan Gjykatës Kushtetues. Dhe kur pritej një interpretim nga Kushtetueseja për ti dhënë vënë ‘kapak’ debatit, gjykata vendosi të mos merrte në shqyrtim kërkesën e deputetëve të opozitës, me arsyetimin se ata nuk janë palë në konflikt.
Sipas procedurës, pas marrjes së njoftimit nga Kuvendi, tanimë SPAK pritet ti dërgojë kërkesë Gjykatës së Posaçme për vendosjen e një mase më të ashpër ndaj kryedemokratit Sali Berisha.
Gjykata e Posaçme vendos rrëzimin apo pranimin e kërkesës. Gjasat janë që GJKKO të noterizojë kërkesën e SPAK për vendosjen e një mase arresti ndaj Berishës. Më tej, për vendimin e gjykatës informohet Policia, që është organi zbatues i vendimit.
