Kërkesa e SPAK për heqjen e imunitetit ndaj Sali Berishës me qëllim ashpërsimin e masës së sigurisë ndaj tij po shqyrtohet këtë të Hënë.
Kryetari i PD-së, Sali Berisha është ishte prezent në seancë, por po përfaqësohet me prokurorë të posaçme nga dy avokatët e tij, Genc Gjokutaj dhe Sokol Mëngjesi. Prezent në seancë janë deputetët e PS dhe Enkelejd Alibeaj nga grupi Basha. Ndërsa deputetët e opozitës e kanë bojkotuar seancën.
Të mërkurën e 12 Dhjetorit, Prokuroria e Posaçme kërkoi autorizimin nga Kuvendi për ashpërsimin e masës ndaj Berishës, lidhur me procedimin penal për privatizimin e ish-kompleksit sportiv “Partizani”. SPAK shprehet se ashpërsimi i masës kërkohet në kushtet kur Berisha nuk ka respektuar masën e detyrim paraqitjes, caktuar më herët ndaj tij nga GJKKO dhe konfirmuar më pas nga Apeli.
Referuar procedurës që përcakton ligji, kërkesa e prokurorisë do të shqyrtohet fillimisht në Këshillin e Mandateve. Me shumë gjasa, këshilli do të miratojë kërkesën e SPAK. Më pas, vendimmarrja e dytë dhe finale i kalon Kuvendit. Pasi edhe ky institucion jep dritën jeshile, atëherë SPAK i drejtohet me kërkesë mase gjykatës.
Opozita në protestë
Kryesia e Partisë Demokratike ndërkohë vendosi javën e kaluar që të organizojë një protestë ditën e sotme. Protesta do zhvillohet para nisjes së mbledhjes për imunitetin e Berishës, te kryesia e Kuvendit.
Kreu i PD, Sali Berisha tha se kjo protestë nuk ka të bëjë me “hallin e tij personal”.
Në një konferencë për mediat një ditë pas vendimarrjes së kryesisë, Berisha u shpreh se kjo nuk do të jetë një protestë e vetme, por do të nisin një zinxhir protestash.
Një tjetër ptotestë është paralajmëruar gjatë kësaj jave te parlamenti, ditën e seancës plenare.
Para protestës, kreu i PD, Sali Berisha ka deklaruar se nuk do të shkojë në mbledhjen e Këshillit të Mandateve që do të zhvillohet ditën e sotme për shqyrtimin e kërkesës së SPAK që kërkon heqjen e imunitetit të liderit demokrat.
“Sot pra, ata shkojnë si përfaqësues të Edi Ramës, mbi Kushtetutën, mbi parlamentin, poshtërojnë në këtë mënyrë institucionin qendror të një republike parlamentare, de facto sot një narkorepublikë apo republikë e bandës, krimit dhe vjedhjes së shqiptarëve. Edi Rama dhe larot e tij vrapuan drejt parlamentit për t’i kërkuar zevëndësimin e masave anti-kushtetuese që kanë dhënë ndaj meje me masat më të rënda, arrestin me burg ose arrest shtëpie. Ky është poshtërim i parlamentit. Ndaj dhe unë sot nuk mund të ndodhesha kurrë në atë komision. Të pranoja një poshtërim publik të tillë të institucionit që me Kushtetutë është institucioni qendror i Republikës Parlamentare”-tha Berisha.
Kryedemokrati ripërsëriti qëndrimin se kërkesa e SPAK ka qenë që në gjenezë antikushtetuese, për shkak se nuk iu drejtua parlamentit për miratimin e masës së sigurisë ndaj tij.
Berisha paralajmëroi se “sot nis beteja pa kthim në rrugë”, duke iu referuar protestës së sotme të PD.
