Policia ka ushtruar kontrolle në banesën ku jetonte më parë Sokol Mjacaj, i cili dy ditë më parë vrau në burgun e Peqinit, Arben Lleshin dhe plagosi me armë shokun e tij të qelisë, Indrit Shaqaj.
Mësohet se kontrolle janë kryer edhe në banesën e vëllait të Mjacajt, por deri më tani nuk raportohet për asnjë gjurmë që mund të çojë në zbardhjen e rastit.
Kujtojmë se më herë, Mjacaj ka deklaruar se po të mos e kishte marrë vesh se do të futej në regjimin 41 bis, nuk do ta kryente vrasjen, atë ditë. Për regjimin 41 bis, ai është shprehur se i kanë thënë të burgosurit e tjerë duke iu drejtuar “qenke i rrezikshëm ti Sokol, se do të fusin në izolim”.
Ai ka qëlluar 5 herë me pistoletën me mulli. Plumbat, Arben Lleshin e kanë kapur në pjesën e qafës dhe të gjoksit. Ndërkohë i plagosuri ka marrë një plumb në pjesën e barkut, dhe sipas mjekëve ai ndodhet jashtë rrezikut për jetën.
Sokol Mjacaj është pyetur për disa emra konkret, për sa i përket vrasjes së Arben Lleshit nëse ishte paguar apo jo, por ai është treguar i rezervuar dhe ka thënë se e vrau për sherrin brenda burgut.
