Një 43-vjeçar shqiptar, është arrestuar këtë të premte në portin e Barit pasi akuzohet se është pjesë e një bande hajdutësh.
Mediat e huaja shkruajnë se ndaj shtetasit shqiptar, identiteti i të cilit ende nuk bëhet me dije ishte lëshuar një urdhër arresti, dhe është ndaluar nga policia teksa fshihej në një kamion për ti shpëtuar kontrolleve.
“Hetimet për aktivitetet e bandës së grabitjeve në zonën “Cilento” dhe lidhjet e saj me subjektet shqiptare duket se janë pjesë e një tabloje më të gjerë, e cila përfshin edhe krime që lidhen me trafikun e drogës. Operacionet e fundit në fakt kanë çuar në arrestime të shumta lidhur me importimin e drogës nga Shqipëria në Portin e Barit”,- janë shprehur autoritetet vendase.
Sa i takon shqiptarit, ai është dërguar në burgun e Barit në dispozicion të Autoritetit Gjyqësor.
