Opozita ka të drejtë në kauzat e saj, por për deputeten demokrate, Jorida Tabaku, në seancën e sotme parlamentare ku diskutohej buxheti i 2024, deputetët demokrat do duhet të zgjidhnin një tjetër rrugë. Kjo rrugë, sipas saj, nuk duhet të ishte kaosi dhe flakadanët, por argumentet dhe idetë. Demokratja thekson se kjo rrugë ka rezultuar se nuk ka qenë efektive as në të shkuarën.
“Jam përpjekur që në këtë situatë të vështirë të japë se çfarë ndodhë me buxhetin, protesta e opozitës është e drejtë, arsyet janë të drejta, por ne duhet të kishim qenë pjesë e buxhetit dhe të prodhonim një strategji ndryshe, e cila ka rezultuar jo efektive edhe në të shkuarën. Ndodhemi në një situatë ku është pjesë e kauzave tona, duhet të ishim përballur me argumente dhe ide”, tha Tabaku.
E ftuar në A2 CNN, Tabaku renditi disa nga rrugët që do duhet të ndjekë opozita që zëri i saj të dëgjohet.
“Kërkesat janë të drejta, pas inceneratorëve nuk është lejuar asnjë Komision, kemi dhe seancën për ligjin e lojërave të fatit, për këtë arsye kisha propozuar që ne të ishim rikthyer diskutimeve dhe të insistonim për cështjen e Komisioneve Hetimore në hapësira të ndryshme, unë jam përpjekur që komisionet hetimore t’i çoj në progres raport, i kam dërguar në të gjitha platformat ku e kam zë”, shtoi deputetja.
Një ditë më parë, kryeministri Edi Rama ftoi opozitën që të çojnë kërkesën për ngritjen e Komisioneve Hetimore, mirëpo deputetja demokrate, Jorida Tabaku ka treguar se përse nuk e bëjnë këtë hap.
“Ca ka ndodhur me kërkesa, e dini që parlamenti ka 2 vendime të Gjykatës Kushtetuese që nuk i zbaton, nëse shkohet sot kërkesa për Komisione Hetimore, do të paktën 2 vite që te merrte vendimi, që na kalon neve në mandatin tjetër qeverisës, pra betejën e shtyn në kalenda greke”, tha ajo.
Tabaku tha se është mazhoranca ajo që duhet të shtrijë dorën për negociata, pasi opozita nuk ka çfarë bën më.
“E kam thënë që nuk jam dakord me këtë mënyrë, por kështu ka vendosur shumica e deputetëve dhe jam dakord me Zotin Neza, që konsensusin për negociata, ose hapin duhet ta hedh qeveria, qeveria ka refuzuar kërkesën, opozita nuk ka çfarë bën tjetër”, përfundoi Tabaku.
