Pas votimit në Kuvendin Kombëtar për votëbesimin e tij në krye të partisë, Sali Berisha është prononcuar për gazetarët, ku një prej pyetjeve që iu drejtua ishte dhe nëse a do t’i futet politikës vajza e tij, Argita Malltezi pas fjalimit të mbajtur ditën e sotme.
Berisha u shpreh se Argita është një aktiviste e PD që në ditët më të para të themelimit të saj dhe shprehu si aktiviste e PD-së, mendimet e veta. Sipas tij, ai fjalim nuk do të thotë më shumë se sa kaq.
“Argita Malltezi mbajti një fjalim si shumë të tjerë aty. Argita Malltezi është një aktiviste e PD-së, që në ditët më të para të themelimit të saj, ka qenë studente. Në këtë kontekst, ajo nuk është ndarë kurrë nga PD. Ky është fjalimi i parë publik i saj në kuvendet e partisë, por kjo nuk do të thotë asgjë më shumë sesa një fjalim në të cilin shprehu si aktiviste e PD-së, mendimet e veta.” – tha Berisha.
Ndër të tjera, Berisha tha se të gjitha fjalimet në Kuvendin e PD-së bashkohen tek një pikë, tek mosbindja civile.
“Ju ndoqët sot Kuvendin e PD-së dhe unë më së pari dua të falënderoj të gjithë delegatët, delegatet, të ftuarit, të falënderoj diskutantët për diskutimet ndër më të mirat, më të shkëlqyerat që janë mbajtur ndonjëherë në këtë sallë. Të falënderoj organizatorët për një organizim të përsosur të kësaj ngjarje me një rëndësi të madhe për PD-në, opozitën, por shoqërinë shqiptare dhe Shqipërinë. Siç i ndoqët fjalimet, ato bashkoheshin në një thirrje që buronte nga zemra e përfaqësuesve të PD për popullin opozitar, të bashkohet në mosbindjen civile, aksion pa kthim për shpëtimin e Shqipërisë nga narkodiktatura e Edi Ramës. Besoj dhe jam i bindur se ky Kuvend me mesazhet e qartë frymëzuese që ka përcjellë në mbarë kombin shqiptar, në Shqipëri dhe jashtë vendi, përbën në vetvete një moment jashtëzakonisht të rëndësishëm për të sotmen dhe të ardhmen e vendit. Theksoj edhe njëherë, beteja nuk është një betejë politike për PD-në, është një betejë për shpëtimin e Shqipërisë dhe kombit shqiptar.” – tha lideri demokrat.
