Autoritetet policore greke kanë shpallur në kërkim një shtetas shqiptar, si autor të një vrasje të regjistruar më 17 tetor të këtij viti, teksa është zbardhur së fundmi. Në kërkim është shpallur 41-vjeçari me origjinë nga Lushnja, Orjon Llupo, i cili akuzohet se ka vrarë me thikë shtetasin grek Nikolao Mazarakis, 38-vjeç.
Krimi dyshohet se ka ndodhur pas një sherri banal mes tyre për një dozë heroinë, në vendin e quajtur Ajia Sotiria, në lagjen Menidhi të Athinës. Shpejt sherri degjeneroi në përleshje mes tyre dhe përfundoi pasi Llupo nxori një thikë dhe e goditi viktimën duke i shkaktuar atij plagë të rënda dhe hemorragji.
Pavarësisht se dy persona që ndodheshin me Mazarakin ia lidhën këmbën me një fashë, 2 orë më vonë viktima vdiq prej hemorragjisë edhe pse në zonë mbërritën ambulancat dhe policia. Mjeku ligjor që ekzaminoi trupin e viktimës tha se ai kishte humbur jetën prej prerjeve të shumta me thikë, duke i shkaktuar hemorragji të rëndë fatale.
Dy dëshmitarë okularë i thanë policisë, me siguri të plotë, se autori ishte Llupo, por pavarësisht operacionit për gjetjen e tij, nuk u bë i mundur arrestimi në territorin grek. Vetëm paraditen e kësaj të enjteje, policia greke nëpërmjet familjarëve të autorit të dyshuar mundi të komunikojë me Orjon Llupon, ku pa asnjë mëdyshje, Llupo pranoi se ishte ai që plagosi dhe vrau Mazarakin.
Prej hetimeve rezultoi se Llupo kishte kaluar në territorin shqiptar dhe ndodhet në zonën e Divjakës. Policia thotë se ai refuzoi të kthehet për t’u dorëzuar, ndaj dhe do të nisë menjëherë procedurat për arrestimin e tij në Shqipëri dhe ekstradimin tij në Greqi për t’u gjykuar.
Llupo rezulton se ka pasur veprimtari të shpeshtë kriminale. Ai është dënuar për pjesëmarrje në organizatë kriminale, armëmbajtje pa leje dhe shkelje të ligjit për emigracionin.
Gjithashtu, mësohet se Orjon Llupo ka procedime të hapura edhe në vendin tonë. Ai është ndaluar në Sarandë dhe Lushnjë, nën akuzat e përdorimit të lëndëve narkotike, ku po procedohej në gjendje të lirë.
*Fotot e mëposhtme të autorit Orjon Llupo janë të para shumë viteve
