Shumë qytetarë, të rritur dhe fëmijë të sëmurë nga leuçemia po përballen me vështirësi të shumta prej mungesës së ilaçeve kryesore tek Qendra Spitalore Universitare “Nënë Tereza”.
Një rast i ngjashëm është denoncuar këtë të dielë nga gazetari Osman Stafa. Përmes një postimi në rrjete sociale, Stafa bën me dije se Rei 6-vjeçar vuan nga leuçemia akute, dhe ka 26 ditë pa mjekim, pasi Ministria e Shëndetësisë, nuk siguron as mjekimet bazë. Konkretisht 4 flakonë Asparaginaza 10000UI.
Përpos vështirësisë për gjetjen e medikamentit, sepse në Shqipëri nuk gjendet, familjarët kanë deklaruar se nuk e përballojnë dot as cmimin e tyre.
Mësohet se djaloshi i mitur po rritet nga gjyshja, pasi nënën nuk e ka pranë dhe babai vuan nga depresioni. Gazetari ka bërë apel për ndihmë, kushdo që ka njohje me mjekë apo depo farmaceutike jashtë, të mundësoje medikamentin për vogëlushin.
Vlen për tu theksuar se mungesa e ilaçeve në QSUT është një problem i përsëritur në vite, dhe teksa institucionet ia hedhin përgjegjësinë njëra tjetrës, pacientët e mitur te Onkologjiku rrezikojnë jetën, ndërsa prindërit zhyten në borxhe për të blerë ilaçet shpëtimtare për fëmijët e tyre.
