Lulzim Basha njoftoi sot se ka dorëzuar në Parlament, projektligjin për vetting-un e politikanëve.
Pavarësisht se edhe vetë është i implikuar me akuza për kate kullash, kreu i PD-së së “vulës” paralajmëroi se përmes kësaj nisme kërkohet që të mundësohet “kontrolli i detajuar i pasurisë së çdo politikani të rrethit të tij familjar dhe shoqëror, si dhe lidhjet e papërshtatshme dhe mundësinë e bashkëpunimit me krimin e organizuar”.
“Sot kam depozituar projektligjin për vetting-un e politikanëve. Siç e pata njoftuar grupi i punës ka bërë gati një projektligj që mundëson kontrollin me detajuar të pasurisë së çdo politikani, të rrethit të tij familjar dhe shoqëror, si dhe lidhjet e papërshtatshme dhe mundësinë e bashkëpunimit me krimin e organizuar. Duhet që politikanët shqiptarë t’i nënshtrohen të njëjtit kontroll si magjistratët, por edhe punonjësit e gardës dhe policisë. Nuk ka më asnjë alibi, çdo deputet duhet të shprehet përmes votës së tij për ligjin e vettingut të politikanëve. Duhet t’i tregojmë shqiptarëve cilët janë politikanët e korruptuar, të lidhur me krimin dhe për t’i dhënë shqiptarëve një politikë të pastër”, tha Basha mes të tjerash.
Vlen të theksojmë që Gazment Bardhi pak ditë më parë hodhi akuza të forta ndaj pasurisë marramendëse që zotëron Lulzim Basha. Sipas tij, Basha ka marrë “dhuratë” nga oligarkët disa kate banimi në një nga kullat më të larta në Tiranë.
“Të jem i sinqertë, u emocionova shumë veçanërisht nga aleanca e kullave. Parafolësi është i vetmi që muajin e fundit ka marrë nja dy kate në një kullë në një nga zonat më të shtrenjta të Tiranës, dhe kur vjen këtu, numëro njëherë katet e kullave të tua. Ti je i vetmi një njeri që je vetëshpallur kryetar dhe nuk guxon të mbledhësh grupin parlamentar të partisë që ti mendon se përfaqëson. Nuk je as opozitë, as përfaqësues i partisë demokratike”, tha ditë më parë Gazment Bardhi.
Por Lulzim Basha është akuzuar nga selia blu dhe bashkëpunëtorët e tij të afërt, se ka bërë pazare me Ramën për të shkatërruar PD-në dhe se ka vënë gjoba për biznesmenët për të përtfituar prona të patundshme.
