Është arrestuar shoferi i mjetit tip “Mercedes Benz”, që përplasi dy të rinj pranë Kryeministrisë, pasditen e kësaj të diele.
Në pranga ka rënë Jorgaq Thengjilli, 21-vjeç, banues në kryeqytet, i cili humbi kontrollin e mjetit për shkak të shpejtësisë dhe përplasi dy këmbësore në rrugën “Ismail Qemali”.
Blutë bëjnë me dije se nga testi paraprak ka rezultuar se drejtuesi i mjetit nuk ishte nën ndikimin e alkoolit, apo të lëndëve narkotike, ndërsa raportohet se ai është ndëshkuar më parë për tejkalim shpejtësie në zona të banuara.
Ndërkohë dy të rinjtë e plagosur janë dërguar në spitalin e Traumës, ku një prej tyre iu nënshtrua një ndërhyrje kirurgjikale.
“Specialistët e Komisariatit të Policisë Rrugore Tiranë arrestuan shtetasin J. Th., 21 vjeç, banues në Tiranë, për veprën penale “Shkelja e rregullave të qarkullimit rrugor”.
Ky shtetas, ditën e sotme, në rrugën “Ismail Qemali”, duke drejtuar automjetin, ka humbur kontrollin mbi drejtimin e automjetit, dyshohet për shkak të shpejtësisë mbi normat e lejuara, dhe ka aksidentuar shtetasit D. K., dhe K. D., të cilët si pasojë janë dëmtuar dhe ndodhen në spital, nën kujdesin e mjekëve.
Drejtuesi i automjetit i është nënshtuar testit me “Drager” dhe “AquilaScan” dhe ka rezultuar që nuk kishte konsumuar pije alkoolike, apo lëndë narkotike.
Ky shtetas është ndëshkuar më përpara për mosrregullim shpejtësie në qendrat e banuara”,- njofton Policia.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
